Elbasy Nursultan Nazarbaevtyń tapsyrmasymen salynǵan elordadaǵy Qazaqstan jeńil atletıka kesheninde Táýelsizdiktiń 30 jyldyǵy aıasynda Nur-Sultan qalasynyń jeńil atletıkadan eresekter jáne kishi jastaǵy jasóspirimder arasynda Nur-Sultan Open-2021 ashyq chempıonaty ótti.
Baıraqty básekeniń ashylý saltanatyna Mádenıet jáne sport mınıstri Aqtoty Raıymqulova, Nur-Sultan qalasy Jeńil atletıka federasııasynyń basshysy, elorda ákimi Altaı Kólginov, Olımpıada chempıony Serik Sápıev jáne jazǵy Olımpıada oıyndarynyń júldegeri, jeńil atlet Dmıtrıı Karpov sóz sóılep, jarysqa qatysýshylarǵa sáttilik tiledi.
Mınıstr óz sózinde elimizde jastardyń jeńil atletıkaǵa degen qyzyǵýshylyǵy joǵary ekendigin atap ótti. «Prezıdent Qasym-Jomart Toqaev Qazaqstan halqyna Joldaýynda óskeleń urpaqtyń sporttyq jáne shyǵarmashylyq áleýetine asa nazar aýdarý qajet ekendigin aıtqan bolatyn. Osy oraıda buqaralyq, balalar-jasóspirimder sportyn damytyp, ár oblysta, iri aýdan ortalyqtarynda sport úıirmelerin ashý qajet. Sporttyq ınfraqurylymǵa da asa den qoıý kerek. Mınıstrlik osy baǵytta jumys jasap jatyr. Búgingi tańda, Qazaqstannyń jeńil atletteri Olımpııa oıyndarynda, dúnıejúzilik chempıonattar men halyqaralyq jarystarda joǵary nátıjelerdi kórsetip, jeńimpazdar men júldegerler atandy. Táýelsiz elimizge tuńǵysh altyn medaldy 2000 jyly Sıdneıde (Aýstralııa) ótken Olımpııa oıyndarda kedergi arqyly júgirýshi Olga Shıshıgına ákeldi. Jeńil atletıka sportynda Dmıtrıı Karpov, Olga Rypakova sekildi álem moıyndaǵan sportshylarymyz bar. Aldaǵy ýaqytta da rýhy myqty, Qazaqstan sportyn álemge tanytatyn jas sportshylar shyǵady degen úmittemiz. Jarysqa qatysýshylarǵa sáttilik tileımin», dedi Aqtoty Raıymqulova.
Elorda ákimi Altaı Kólginov Nur-Sultan qalasy elimizdegi sporttyq qalalardyń biri degen atqa laıyq ekenin aıtyp, Qazaqstan jeńil atletıka kesheni bizge halyqaralyq deńgeıdegi jarystar ótkizip qana qoımaı, zamanaýı sport juldyzdary men jattyqtyrýshylardy tárbıelep, jastarymyzdy bala kúninen sportpen shuǵyldanýyna múmkindik beretinin jetkizdi.
– Memleket basshysynyń tapsyrmasy boıynsha sport nysandarynyń qoljetimdiligin arttyrý jáne qala turǵyndaryn buqaralyq sportqa qyzyqtyrý boıynsha tıisti jumystar júrgizilip jatyr. Balalar men jasóspirimder sportyna, federasııalarǵa qoldaý kórsetemiz», dedi Nur-Sultan qalasy Jeńil atletıka federasııasynyń basshysy, elorda ákimi A.Kólginov.
Nur-Sultan qalasynyń ashyq chempıonatyna elorda sportshylarynan bólek, elimizdiń SQO, Qaraǵandy, Aqmola, Qostanaı oblysy jáne Shymkent qalasynan kelgen 150-den astam sportshysy jarys kórigin qyzdyryp, bas júlde úshin baq synady. Olar jeńil atletıkanyń 5 túri, ıaǵnı ıadro laqtyrý, 4h200m aralas estafeta, uzyndyqqa sekirý, júgirý jáne jeńil atletıkalyq júris boıynsha júldelerdi sarapqa saldy.
Esterińizge sala keteıik, Qazaqstan jeńil atletıka kesheni ótken jyldyń kúzinde sportshylar úshin esigin aıqara ashqan bolatyn. Bul oryn IAAF-tiń barlyq talabyna sáıkes keledi. Munda respýblıkalyq jáne halyqaralyq jarystar, sonyń ishinde álem chempıonattary men Olımpııa oıyndaryn ótkizýge múmkindik bar. Sport kesheninde júgirý joldary ornatylǵan atletıkalyq alań, trenajer zaly jáne ıadro laqtyrýǵa, bıiktikke, uzyndyqqa sekirýge arnalǵan sektorlary, balalar alańy, basseınder sekildi artyqshylyqtary bar. Manej 7000 kórermenge eseptelgen. Atalǵan chempıonat jeńil atletıkalyq kesheninde ótkizilip otyrǵan alǵashqy týrnır. Jýyq arada bul jerde IX Azııa chempıonaty ótedi dep josparlanýda.