Qazaqstan elshisi Darhan Káletaev Ýkraınanyń halyq depýtaty, «Batkıvshına» partııasynyń múshesi Ivan Kırılenkoǵa Qazaqstan men Ýkraına arasyndaǵy dostyq pen yntymaqtastyqty damytýǵa qosqan úlesi úshin joǵary memlekettik nagrada - 2 dárejeli «Dostyq» ordenin tabys etti, dep habarlaıdy Egemen.kz.
Nagradany qabyldaı otyryp, I.Kırılenko Prezıdent Qasym-Jomart Toqaevqa eki el arasyndaǵy baılanysty nyǵaıtýǵa qosqan úlesin joǵary baǵalaǵany úshin alǵys aıtty. О́zi úshin jáne Qazaqstan men baýyrlas qazaq halqyna jyly lebizben qaraıtyn búkil úlken «ýkraınalyq komanda» úshin bul úlken mártebe, úlken jetistik ekenin atap ótti.
Sonymen birge, ol birneshe ret Qazaqstanǵa kelip, ınnovasııalyq damý jolyna negizdelgen eldiń jetistigine árdaıym súısinetindigin basa aıtty. Onyń aıtýynsha, Qazaqstan progresiniń qozǵaltqyshy QR Tuńǵysh Prezıdenti – Elbasy Nursultan Nazarbaevtyń ınnovasııalyq jáne tereń eseptelgen ıdeıalary, sondaı-aq olardyń dáıekti júzege asyrylýyn qamtamasyz etý qabileti. Sondaı-aq, ol ýkraınalyq túrli «alańdarda» jáne Joǵarǵy Radanyń «qabyrǵalarynda» qazirgi zamanǵy Qazaqstannyń úlgisin mysalǵa keltiretinin qosty.
Halyq depýtaty dostyq pen ózara senimge negizdelgen Qazaqstan-Ýkraına qatynastaryn odan ári damytý úshin barlyq kúsh-jigerin salatynyna sendirdi.