Bilim jáne ǵylym mınıstrligi sapasyz bilim beretin joǵary oqý oryndarynyń sanyn qysqartý boıynsha jumysty jalǵastyryp jatyr. Barlyq tekserý qatań túrde qoldanystaǵy zańnamaǵa sáıkes júzege asyrylýda. Talaptar boıynsha joǵary oqý oryndary anyqtalǵan buzýshylyqtardy berilgen ýaqyt ishinde joıýy tıis, dep habarlaıdy Egemen.kz
Máselen, ótken jyly QR BǴM Bilim jáne ǵylym salasyndaǵy sapany qamtamasyz etý komıteti Qazaq medısınalyq úzdiksiz bilim berý ýnıversıtetiniń bilim berý qyzmetine tekserý júrgizip, nátıjesinde óreskel buzýshylyqtar anyqtady.
Atap aıtsaq, joǵary oqý ornyndaǵy bakalavrıat, magıstratýra, doktorantýra, rezıdentýra baǵdarlamasy boıynsha oqý úrdisi qajetti professorlyq-oqytýshylyq qurammen jáne tıisti materıaldyq-tehnıkalyq bazamen qamtamasyz etilmegen. Sonymen qatar oqý ornyndaǵy ózge de mańyzdy kórsetkishter belgilengen eń tómengi normalarǵa sáıkes kelmeıdi.
2020 jylǵy shilde aıyndaǵy tekseris nátıjeleri boıynsha atalǵan ýnıversıtet lısenzııasynyń kúshi toqtatylyp, anyqtalǵan buzýshylyqtardy joıýǵa ýaqyt berildi. Alaıda, qaıta tekseris júrgizý kezinde Qazaq medısınalyq úzdiksiz bilim berý ýnıversıteti Komıtettiń nusqamalaryn oryndamaǵany jáne zańnamany óreskel buza otyryp, jumysyn jalǵastyrǵany belgili boldy.
«Bolashaq dárigerlerge sapaly bilim berý – adamdardyń ómiri men densaýlyǵynyń kepili. Osy oraıda biz sotqa júginýge májbúr boldyq. Qazaq medısınalyq úzdiksiz bilim berý ýnıversıtetin jabý máselesin sot ta, Bilim jáne ǵylym mınıstrliginiń Komıteti te qarady. Almaty qalasynyń mamandandyrylǵan aýdanaralyq ákimshilik sotynyń qaýlysyna sáıkes Qazaq medısınalyq úzdiksiz bilim berý ýnıversıteti ákimshilik jaýapkershilikke tartyldy. Odan bólek, JOO-ǵa aıyppul salynyp, bas lısenzııadan aıyrý týraly sheshim shyǵaryldy», dedi QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.
Qazaq medısınalyq úzdiksiz bilim berý ýnıversıteti Almatydaǵy dárigerlerdiń biliktiligin jetildirý uıymynyń bazasynda 2015 jyly qurylǵanyn aıta ketken jón. Búgingi tańda atalǵan oqý ornynda 3 myńnan astam stýdent oqıdy.
«Elimiz boıynsha 14 joǵary oqý orny bolashaq dárigerlerdi daıyndaıdy, onyń beseýi Almaty qalasynda ornalasqan. QazMÚBBÝ-da oqyǵan stýdentterdiń granttary saqtalady jáne olar basqa joǵary oqý oryndaryna aýystyrylady. Oqý quny ózgermeıdi. Sondaı-aq oqytýshylardy jumysqa ornalastyrý máselesi jeke qarastyrylyp jatyr», dep atap ótti Gúlzat Kóbenova.
Bas lısenzııadan aıyrý týraly sot sheshimi 10 jumys kúninen keıin zańdy kúshine enedi jáne joǵary oqý orny bilim berý qyzmetin toqtatýǵa mindetti bolady.