Sýretshini ózgelerden daralap turatyn basty qasıet tabıǵattyń tylsym boıaýlaryn seziný deıtin bolsaq, Anar Ábjanovanyń kenebinde tabıǵat sulýlyǵy men tirshilik kelbeti tús arqyly kórinis tabady. Almatyda qylqalam sheberiniń «Kók tústiń 50 reńi» dep atalǵan jeke kórmesi ashyldy.
«Qazaqstannyń 100 jańa esimi» qataryna engen Anar Ábjanova – Qazaqstan Sýretshiler odaǵynyń múshesi. О́nerdi ómir dep biletin ol buǵan deıin de kórermen qaýymǵa óziniń ondaǵan jeke kórmesin usynyp úlgerdi. AQSh, Chılı, Fransııa, Italııa, Reseı memleketterinde ótken halyqaralyq baıqaýlar men plenerlerde qoltańbasyn qalyptastyryp, shyǵarmashylyǵyn udaıy damytyp keledi. «Shabyt» festıvaliniń laýreaty.
Tústerdiń tilin tereń túısinetin týyndyger tabıǵat boıaýlaryn kóńilge kóshirip alǵan dersiz. Estý qabiletinen qaǵajý kórse de jaryq álemniń alýan túrli boıaýyn óte názik túrde sezinip, sol sezine bilgen dúnıesin kenep betinde sheber aıshyqtaıtyn Anardyń armany qazaq beıneleý ónerinde óz qoltańbasyn qaldyrý. Jas talant tabandy eńbek pen kirshiksiz kóńil ǵana ómirdi jarqyn túske boıaıdy dep esepteıdi.
– Shyǵarmashylyq keshim «Kók tústiń 50 reńi» dep jaıdan-jaı atalǵan joq. Shyndyǵynda da meniń barlyq jumystaryma tán ortaq ta negizgi reń – kók tús. Onyń ústine kók tús ózim úshin ónerdegi negizgi de unamdy tústiń biri. Kórmege maıly jáne akrıldi boıaýlarmen salynǵan 60-tan astam týyndym qoıyldy, – deıdi avtor.
Anar Almaty qalasynyń qysqy kórinisterine arnalǵan sýretter toptamasynda osy kók tústiń reń-qasıetterin molynan paıdalanǵan. Ashyq ta qanyq, taza kók tús arqyly qysqy aıazdy, almaly shahardyń aýa raıyn, aq qardan syrǵa taǵynǵan aǵashtar men aq sálde oranǵan ǵımarattardy dál bederlegen. «Keshki sát. Dostyq dańǵyly», «Qysqy jyly kún. Bógenbaı batyr kóshesi» tárizdes shyǵarmalarynda sýretshi túrli túster arqyly Almatynyń ásem beınesin aıshyqtaı kele, talaı estelikter tunǵan tanys kóshelerdi kórermen kóńiline barynsha jaqyn etip kórsetýge kúsh salady.
Aıtýly óner jármeńkesin qala turǵyndary men qonaqtary Dostyq dańǵylynda ornalasqan «Almaty áýenderi» mekemesiniń Almaty Gallery kórmesinen tegin tamashalaı alady.
ALMATY