Aýstralııa ashyq chempıonatyndaǵy sátsizdiginen keıin Melbýrndegi WTA 250 Phillip Island jarysyna qatysqan Zarına Dıas atalǵan dodanyń úshinshi aınalymynda súrindi. Al Italııadaǵy dodany Dmıtrıı Popko sátti bastady.
Zarına Dıas Aýstralııanyń Melbýrn qalasynda ótip jatqan týrnırdiń úshinshi kezeńinde toqtady. Alǵashqy aınalymda dúnıejúzilik reıtıngte ózinen bir saty tómen turǵan (82-oryn) amerıkalyq Krıstına Makheıldi úsh sette 3:6, 6:3, 6:1 nátıjesimen jeńse, ekinshi kezeńde álemniń 96-raketkasy rýmynııalyq Ana Bogdandy úsh sette 6:4, 5:7, 6:2 esebimen qapy qaldyrdy. О́kinishke qaraı, úshinshi kezeńde álemniń 20-raketkasy, 2019 jylǵy AQSh ashyq chempıonatynyń jeńimpazy kanadalyq Bıanka Andreeskýden aılasyn asyra almady. Birinshi partııada 1:6 esebimen utylǵan Dıas jarysty ári qaraı jalǵastyrýdan bas tartty.
Al Italııadaǵy Bella chellendjer týrnırine qatysyp jatqan Dmıtrıı Popko (170) alǵashqy aınalymda álemniń 88-shi, osy dodanyń 2-raketkasy amerıkalyq Sebastıan Kordamen kúsh synasty. 1 saǵat 10 mınýtqa sozylǵan básekede jerlesimiz 6:4, 6:3 esebimen eki partııada jeńiske jetti. Endi D.Popko shırek fınalǵa shyǵý úshin álemniń 187-raketkasy latvııalyq Ernest Gýlbıs nemese reıtıngte 373-satydaǵy ıtalııalyq Raýl Brankachchıo jubynyń jeńimpazymen kezdesedi. Italııadaǵy doda 21 aqpanda aıaqtalady.