Búgin Qostanaı oblysynyń ákimi Arhımed Muhambetov aımaq turǵyndaryna óńirdiń 2020 jylǵy áleýmettik-ekonomıkalyq damý qorytyndysy jóninde esep berip, alda atqarylýy tıis mindetterdi atap ótti, dep habarlaıdy Egemen.kz.
Aımaq basshysynyń baıandaýynsha, óńirde ónerkásip óndirisi 7,4%, aýyl sharýashylyǵynyń kólemi 20,8%, ınvestısııalar 11,0%, qurylys jumystary 28,4%, halyqty baspanmen qamtý 13,1%-ǵa ósken.
Oblys ákimi ár salaǵa jeke toqtalyp ótti. Mysaly, byltyr aýyl sharýashylyǵynyń naqty kólem ındeksi 120,8%-ke jetken. Jalpy ónim kólemi - 572,0 mlrd teńge.
«Mal sharýashylyǵynda ósim baıqaldy. Et óndirisi 6,1%, sút - 2,0%-ǵa ulǵaıdy. Qostanaı oblysy elimizde un óndirisi boıynsha birinshi orynda tur. Mysaly, byltyr 1 mln tonna un shyǵardyq. Sút óndirisi boıynsha 77 myń tonna kórsetkishpen ekinshi orynda turmyz. Al sary maı óndirisi boıynsha úshinshi oryndamyz, byltyr 4 myń tonna sarymaı óndirdik.
Qaıta óńdelgen aýyl sharýashylyǵy ónimderiniń eksporty boıynsha oblys respýblıkada birinshi oryn alatynyn atap ótý mańyzdy. Bir jyl ishinde 1 mln tonna dándi daqyldar, 800,0 myń tonna un, 10 myń tonna ósimdik maıy (Qytaı, RF, Tájikstan, О́zbekstan), 8 myń tonnaǵa jýyq sút ónimderi (Reseı, Qyrǵyzstan, Tájikstan), 168 tonna et jáne sorpalyq et ónimderi (Reseı), 51 mln. dana jumyrtqa (Reseı, Aýǵanstan, Qyrǵyzstan) eksporttaldy. Bul rette, eksporttyq qorjynda ósimdik maıynyń kólemi 2,8 ese, un - 11%-ǵa ósti, - dedi oblys ákimi.
2020 jyly agroónerkásiptik keshendi damytý salasynda da aıtarlyqtaı tabystarǵa qol jteken. Mysaly, qýaty jylyna 20,0 myń tonna qus etin óndiretin Qarabalyq qus fabrıkasyn qaıta jańǵyrtyldy, Fedorov jáne Jitiqara aýdandarynda 180 basqa arnalǵan zamanaýı 2 taýarly-sút fermasy ashyldy, sondaı-aq Qostanaı aýdanynda jumys istep turǵan taýarly-sút fermasy 740 basqa deıin keńeıtildi.
Bıyl sút baǵytyndaǵy mal sharýashylyǵyn damytý baǵdarlamasy sheńberinde árqaısysy keminde 400 bas saýyn sıyrǵa shaqtalǵan 6 taýarly-sút fermasyn ashý josparlanyp otyr. Onyń ekeýi Qostanaı aýdanynda, qalǵany Beıimbet Maılın, Denısov, Meńdiqara jáne Fedorov aýdandarynda ashylady.
Arhımed Muhambetov kúzgi qus tumaýynan keıin toqyraýǵa ushyraǵan Arqalyq qus fabrıkasynyń qyzmeti qaıta jandandyrylǵanyn aıtty.
«Qus tumaýyna qarsy veterınarııalyq joıý is-sharalary ýaqtyly júrgizildi, jumyrtqa baǵytyndaǵy táýliktik balapandar ákelindi jáne jaqyn arada dúkenderde Arqalyqtyń sapaly jáne qoljetimdi jumyrtqasy paıda bolady» - dedi ákim.
Bıyl AО́K salasynda jalpy quny 7,9 mlrd teńge bolatyn 9 ınvestısııalyq joba iske asyrylyp, 160-tan astam jumys orny ashylǵan.
Pandemııaǵa qaramastan óńir ekonomıkasynda bıyl turaqty ósim bolatynyna senim bildirgen oblys ákimi: «Koronavırýstyq ınfeksııa pandemııasymen baılanysty syrtqy faktorlardyń áserin eskere otyryp, biz óńirdiń makroekonomıkalyq kórsetkishterin oryndaý úshin qolda bar barlyq ósý rezervterin iske qosamyz. 2020 jyly da, 2021 jyly da jalpy óńirlik ónimniń ósýi keminde 3,0% - ti quraıdy dep boljap otyrmyz. Halyqtyń ómir súrý sapasyn jaqsartý maqsatynda óńirdiń odan ári áleýmettik-ekonomıkalyq damýy boıynsha jumys jalǵastyrylatyn bolady» - dedi.