Almaty oblysynyń tabıǵat qorǵaý polıseıleri Balqash kólinde brakonerlikti kásip qylǵan turǵyndy ustady, dep habarlaıdy Egemen.kz Polisia.kz saıtyna silteme jasap.
Almaty oblysy PD Jergilikti polısııa qyzmeti basqarmasynyń qyzmetkerleri oblystyq Orman sharýashylyǵy jáne janýarlar dúnıesi aýmaqtyq ınspeksııasymen birlesken arnaıy shara barysynda Balqash kólinde ruqsatsyz balyq aýlaýmen aınalysqan adamdy ustady. Kúdikti mingen «ÝAZ» markaly kólikti tekserý kezinde tórt qap taban balyq pen alabuǵa balyǵy tabyldy.«Balqash kólin tekserý barysynda Qaratal aýdanynyń 35 jastaǵy turǵyny zańsyz balyq aýlap jatqanynyń ústinen tústik. Sonymen qatar kúdikti paıdalanýǵa múldem tyıym salynǵan plastıkalyq aýdy paıdalanǵany anyqtaldy. Atalǵan derek boıynsha QR Qylmystyq kodeksiniń 335-babyna sáıkes qylmystyq is qozǵalyp, sotqa deıingi tergeý júrgizilýde», dedi oblystyq PD Tabıǵat qorǵaý polısııasynyń ınspektory Baǵlan Rymjanov.
Tártip saqshysynyń aqparatyna sáıkes tabıǵı baılyqqa ruqsatsyz qol salǵan turǵynnyń kóliginen 100 kılogramnan astam balyq pen plastıkalyq aý tárkilengen. Balyqtar arnaıy qabyldaý oryndaryna ótkizilip, túsken qarajat memleket paıdasyna aýdarylady. Sonymen qatar tabıǵat qorǵaýshylar kúdiktiniń zańsyz áreketi memleketke 300 myń teńgeden astam materıaldyq shyǵyn ákelgenin atap ótti.