Almatyda 18 aqpanda «18 kılogers» fılminiń tusaýkeseri ótti. Rejısser Farhat Sharıpovtiń «18 kılogers» fılmi 18 aqpannan bastap otandyq prokatqa shyqty.
«18 kılogers» – bul 90 jyldardyń sońyndaǵy jasóspirimderdiń ómirinen syr shertetin fılm. Kınotýyndy Zara Esenamannyń «Hardkor» jelisi boıynsha túsirildi.
– Bul fılm jasóspirimder týraly... Olardyń oı-tolǵanystaryn, izdenisteri men túńilý kezeńderin, mahabbat jáne dostyq, kumarlyq sezimderin, sondaı-aq tyǵyryqtan shyǵatyn jol taba almaı qalatyndaı áserge bóleıtin qorqynysh sezimderin sýretteıtin týyndy. Alaıda, bul qoqynyshtan qutylý úshin, tek oıaný kerek, - dedi fılmniń rejısseri ári ssenarıı avtory Farhat Sharıpov.
Kınokartınanyń túsirilimderi Almaty qalasynda ótti. Fılmniń qoıýshy sýretshisi Alekseı Shındın ekranda 90 jyldardaǵy Almatyny kórsetý úshin sol kezdegi aýlalardy, sonymen qatar aksessýarlar men turmysta qoldanylatyn zattardy tabý qıynǵa soqqanyn aıtty. Fılmniń operatory – Aleksandr Plotnıkov (rejısser Farhat Sharıpovpen birge «Qyzǵylt qoıan týraly hıkaıa», «Tulǵalyq ósý trenıngi» syndy fılmderdi túsirgen).
Aıta ketsek, fılmdegi basty rólderdi jas akterler somdady. Basty keıipkerlerdiń birin oınaǵan Musahan Jumahan akter bolýdy armandamaǵanyn, kastıngke tek dosyn qoldaý úshin kelgenin, keıin basty rólge bekitilgenin estigende qatty tańqalǵanyn aıtty. Aktrısa Kamıla Fýn-So bolsa, kastıng týraly aqparatty áleýmettik jeliler arqyly estip kelgen eken. Al fılmde Shyńǵystyń rólin somdaǵan akter Álibek Adyken kıno álemine bes jyl buryn kelgenin aıtty. Onyń shyǵarmashylyq qorjynynda birneshe serıaldar men qysqametrajdy fılmder bar.
Esterińizge sala ketsek, 2020 jyly qazan aıynda «18 kılogers» kórkem fılmi qazaq kınosynyń tarıhynda alǵash ret HHHVI Halyqaralyq Varshava kınofestıvaliniń bas júldesin jeńip alǵan bolatyn. Keıin bul týyndy Germanııanyń Kotbýs qalasynda ótken HHH Halyqaralyq kınofestıvalde úzdik dep tanyldy. Otandyq kınokartına festıvaldiń Youth Film Competition atty konkýrsttyq baǵdarlamasyna qatysqan bolatyn.