Búginde «Qazyna» bı ansambli dese áýeli toptyń kórkemdik jetekshisi Záýre Bekembaıqyzy eske túsedi. Qazaqtyń ulttyq bı ónerin negizin qalaǵan Shara Jıenqulovanyń ádisimen ulttyq ónerimizdi dáriptep, shákirt tárbıeleýde aıanbaı qyzmet etip júrgen tulǵalardyń bir ári biregeıi. Kóptiń kókeıinde bir suraq: «Záýre, Qazyna bı tobyna qaı ýaqyttan bastap jetekshilik etip keledi?».
Bı tobynyń alǵashqy quramy 1986 jyly Ál-Farabı atyndaǵy mádenıet ınstıtýtynyń negizinde quryldy. Ol kezde «Qazyna» ulttyq saz aspaptarymen birge bolatyn. Eń alǵashqy bı jetekshisi – Sáýle Balbarakova, al kórkemdik jetekshisi – marqum Musa Jarqynbekov bolǵan. 1995 jyly ansambl tarap, 2003 jyly Shámshi Qaldaıaqov atyndaǵy oblystyq fılormonııa negizinde qaıta qurylyp, bı tobyna QR mádenıet qaıratkeri Záýre Ájibekova jetekshilik jumysyn bastady. 2019 jyldan bastap «Shymkent qalalyq mádenıet úıi» konserttik uıymy» MKQK mekemesinde qyzmet atqaryp keledi.
Záýre Bekembaıqyzy jetekshilik etetin «Qazyna» bı ansambli talaı dodalardy baǵyndyryp, oblystyq, túrli respýblıkalyq, halyqaralyq jarystarǵa qatysyp Ońtústik óńiriniń atyn asqaqtatyp júr. Osynaý qajyrly eńbegin baǵalap 2018 jyly Qazaqstan Respýblıkasynyń Tuńǵysh Prezıdenti, Elbasy N.Nazarbaevtyń jarlyǵy boıynsha “Qazaqstannyń eńbek sińirgen qaıratkeri” qurmetti ataǵy berilse, 2019 jyly Qazaqstan Respýblıkasy Mádenıet jáne sport mınıstiri Alǵys hatymen marapataldy.
Aıta ketetin jaıt, Reseıdiń Ekaterınbýrg qalasynda ótken Halyqaralyq «Reseı Raýshany-2017» óner festıvalinde «Qazyna bı» ansambliniń solısteri Jeke oryndaýshy nomınasııasy boıynsha bas júldeni jeńip alsa, Aýstrııa respýblıkasynda 73-shi ret uıymdastyrylǵan halyqaralyq festıvalde «Tumar» jáne «Qazyna» bı toptary ulttyq ónerdi pash etip kórermen yqylasyna bólendi. Osynaý qajyrly eńbektiń arqasynda kórkemdik jetekshiniń qosar úlesi zor ekeni belgili.