Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetinde «Jaıylymdar týraly» Qazaqstan Respýblıkasynyń Zańyn iske asyrý týraly» taqyrybyna arnalǵan keńeıtilgen otyrys boldy.
Kezdesýge depýtattardan basqa ortalyq memlekettik jáne jergilikti atqarýshy organdardyń, fermerler qaýymdastyǵynyń jáne sharýa qojalyqtarynyń ókilderi qatysty. Kezdesýdi komıtet tóraǵasy Álı Bektaev júrgizip otyrdy.
Otyrystaǵy negizgi máseleniń biri - óńirlerdegi jaıylymdardyń tapshylyǵy jáne osy problemanyń sheshimin zańnamalyq qamtamasyz etý boldy.
«Qazirgi ýaqytta aýyldyq eldi mekenderdegi jaıylymdyq jerlerdiń tapshylyǵy barlyq oblystarda baıqalyp otyr. Maldyń 80%-ǵa jýyǵy aýyldyq eldi mekender mańaıynda jáne onyń aınalasynda jaıylady. Osyǵan baılanysty buryn jeke qosalqy sharýashylyqtardy damytý úshin bólingen 21 mln.ga jýyq jaıylymdyq jerler qatty tozyp ketti», dedi senator Sultan Dúısembınov.
Depýtattyń aıtýynsha, keıbir aýyl turǵyndary kezinde uzaq merzimge aýqymdy jerge ıe bolǵanymen búginde ony paıdalanbaı otyr. Árıne, bul jaǵdaı jergilikti turǵyndardyń narazylyǵyn týdyrady. Ol sondyqtan da osy baǵytta qoldanystaǵy zańnamaǵa túzetýler engizý qajet dep sanaıdy.
Memlekettik organdardyń ókilderi osy baǵytta júrgizilip jatqan jumystar týraly aıta kelip, aýyl turǵyndary úshin jaıylymdardyń tapshylyǵyn ózderi de rastady.
Otyrys qorytyndysy boıynsha oǵan qatysýshylar usynymdar ázirledi.
«Men búgin jergilikti jerlerde «jaıylym paıdalanýshylar birlestigin» qurý qajettiligi týraly aıtylǵan usynys qoldanystaǵy zańnamaǵa jáne bizdiń elimizde iske asyrylyp jatqan saıasatqa sáıkes keledi dep sanaımyn. Sonymen qatar, jekelegen mal ıeleriniń osy uıymdarǵa mindetti túrde kirýi jónindegi zań normalaryn belgileý, sondaı-aq osyndaı birlestikter men jergilikti ózin-ózi basqarý organdarynyń ókilettikterin keńeıtý mańyzdy», dedi komıtet tóraǵasy Álı Bektaev
Senatorlar sonymen qatar Aýyl sharýashylyǵy mınıstrligine keıbir zańnamalyq aktilerge, onyń ishinde Jer kodeksine jaıylym tapshylyǵy máselesin sheshýge yqpal etetin túzetýler engizý máselesin pysyqtaýdy usyndy. Al jergilikti atqarýshy organdar jaıylym jerlerin túgendeı otyryp, árbir aýylǵa qajetti jaıylymdy anyqtaıdy jáne jaıylym ınfraqurylymyn damytý sharalaryn júzege asýyna baqylaýdy kúsheıtetin bolady.