SQO-da polıseıler qatty boranda adasyp ketken kámeletke tolmaǵan eki balany aman alyp qaldy, dep habarlaıdy Egemen.kz Polisia.kz saıtyna silteme jasap.
18 aqpanda saǵat 20 shamasynda Esil aýdany polısııa bóliminiń kezekshi bólimine Birlik aýylynyń mańynda eki balanyń adasyp ketkeni jaıly habarlama kelip túsken. 17 jáne jeti jastaǵy aǵaıyndylar shanaǵa jegilgen atpen Esil ózeniniń jaǵasynda jaıylyp júrgen jylqylardyń tabynyn qaraýǵa shyqqan. Kóp uzamaı qar jaýyp, sońy qatty jelge ulasqan, al balalar ózderimen birge telefondaryn almaǵan. Esil aýdanynyń polısııa bóliminiń bastyǵy Erlik Eslámbekovtiń aıtýynsha, izdeýdi óz qolyna alyp, habarlama alǵannan keıin ÝAZ «Patrıot» avtomashınasy jáne úsh qarda júretin kólikpen aýdandyq bólimniń tájirıbeli qyzmetkerlerinen quralǵan toppen Birlik aýylyna jol tartqan. TJB qyzmetkerlerimen, qoryqshylar jáne jergilikti turǵyndarmen birlese polıseıler joǵalǵan balalardy shuǵyl izdeýge kirisken.
Tóńirekti mashınalarmen, qarda júretin kóliktermen jáne jylqylarmen aralap shyqqan, aýyl turǵyndary TJ túsinistikpen qarap, 40 shaqty aýyldyq, onyń ishinde salt atpen shyqqandar izdeý jumysyna belsendi kómek qolyn sozdy. Qolaısyz aýa raıy jumysty qıyndata túskenimen, ár sanaýly sát asa qymbat boldy. Aınalanyń kórinbeýi izdeý jasaǵyna, olardyń uıytqyǵan boran men qalyń qarda adasýyna qaýip týǵyzdy. Sondyqtan izdeýge jup bolyp shyǵyp, saqtyq sharalaryn saqtaýǵa týra keldi.
Qarda júretin kólikterdiń utqyrlyǵy osyndaı qolaısyz aýa raıynda asa tıimdiligin kórsetti: krımınaldyq polısııa bólimshesiniń bastyǵy Muratbek Aıaǵanov pen aýyl turǵyny Abzal Sadýaqasov balalardy birinshi bolyp kórgenderdiń biri. Aýyldan birneshe shaqyrym jer bolatyn, saǵat tili 23.30-dy kórsetti. Úlken aǵasy ústindegi bar syrt kıimin sheship, baýyryn orap, arqasyna mingizip alǵan… Balalar ábden sharshaǵandyqtan, sóıleýge de shamalary kelmegen. Qatty boran bastalǵan kezde shanadaǵy jegilgen jylqy olardy úıden qarama-qarsy baǵytqa qaraı júrgen. Polıseıler, aýyl turǵyndary, qoryqshylar men qutqarýshylardyń kúsh biriktirýiniń arqasynda ókinishti jaǵdaıǵa jol berilmeı, balalar aman-esen ata-anasyna oraldy.
Aıta ketetini, jergilikti blogerler men jýrnalıster aýdandyq polıseıler men aýyl turǵyndarynyń is-áreketterin laıyqty baǵalap, sol kúni túnde Facebook-te pogondaǵy qutqarýshylardyń atyna alǵys bildirilgen posttaryn ornalastyrǵan.