Ishki ister mınıstri Erlan Turǵymbaev IIM Almaty akademııasy bazasynda jańa arnaıy fakýltetter ashty, dep habarlaıdy Egemen.kz Polisia.kz saıtyna silteme jasap.
Ishki ister mınıstri Erlan Turǵymbaev M. Esbolatov atyndaǵy IIM Almaty akademııasyna bardy. Vedomstvo basshysynyń sapary № 1 fakýltet – basshylyq quramdy daıarlaý jáne № 2 fakýltet – ishki ister organdarynyń orta basshy quramyn daıarlaý fakýltetteriniń ashylýymen tuspa-tus keldi.
– Memleket basshysynyń ishki ister organdarynyń kadrlyq áleýetin daıyndaý jáne arttyrý týraly tapsyrmasy aıasynda polısııa basqarmalarynyń bastyqtary men olardyń orynbasarlarynan bastap aýmaqtyq polısııa departamentteriniń bastyqtaryna deıingi basshy quram laýazymdaryna barlyq taǵaıyndaýlar, sondaı-aq Prezıdenttik kadr rezervine kandıdattardy qabyldaý kórsetilgen fakýltetterde oqýdan ótkennen keıin ǵana júrgiziletin bolady, – dep habarlady mınıstr Akademııanyń professorlyq-oqytýshylyq quramymen kezdesý kezinde.
Vedomstvo basshysynyń málimetinshe, tyńdaýshylardyń birinshi legi osy jyldyń 29 naýryzynda keledi. Dáriskerler pýlyna IIM ortalyq apparatynyń basshylary, IIO ardagerleri, memlekettik organdardyń, azamattyq qoǵam ınstıtýttarynyń ókilderi, qazaqstandyq jáne sheteldik kórnekti ǵalymdar, qoǵam qaıratkerleri kiredi.Mınıstrge ǵylym, bilim jáne polısııanyń praktıkalyq qyzmetin ıntegrasııalaý maqsatynda Akademııada ǵylymı-zertteý ınstıtýtyn qurý jobasy, sondaı-aq halyqaralyq yntymaqtastyq, strategııalyq damý, ıdeologııalyq jáne ımıdjdik jumysty jobalyq basqarý bólimderi tanystyryldy.
– Bul ózgeristerdiń barlyǵy ishki ister organdaryn reformalaý sheńberinde júzege asyrylýda. Vedomstvolyq bilim berýdi damytýǵa basa nazar aýdara otyryp, biz jańa formattaǵy kadrlar daıarlaýdyń irgetasyn qalaımyz. Almaty Akademııasy qyzmetiniń basym baǵyty zamanaýı talaptarǵa jaýap beretin joǵary bilikti qyzmetkerlerdi daıarlaý bolady, – dep atap ótti Ishki ister mınıstri Erlan Turǵymbaev.