Qazaqstan Elshiliginde «Horvatııa-Qazaqstan» dostyq qoǵamynyń saltanatty jınalysy jáne QR Táýelsizdiginiń 30 jyldyǵyna arnalǵan klassıkalyq mýzykanyń kameralyq konserti ótti. Is-sharaǵa kórnekti saıasatkerler, Parlament depýtattary, Horvatııa Konstıtýsııalyq sotynyń músheleri, sondaı-aq qoǵam ókilderi, mádenıet jáne óner qaıratkerleri qatysty, dep habarlaıdy Egemen.kz.
Dostyq qoǵamynyń tóraǵasy Andrııa Karafılıpovıch is-sharany ashyp, Qazaqstan Táýelsizdiginiń mereıtoıy Tuńǵysh Prezıdent - Elbasy Nursultan Nazarbaevtyń esimimen tyǵyz baılanysty ekenin atap ótti. Ol Qazaqstandy damytýǵa jáne halyqaralyq yntymaqtastyqty nyǵaıtýǵa qosqan zor tarıhı úlesi úshin Elshilikke Elbasyna estelik syılyq – ataqty Horvat músinshisi Mate Týrıch jasaǵan «Parýs» músinin tabys etip, jelmen toltyrylǵan jelkender ejelden tabysqa umtylýdyń, erik-jigerdiń, senim men úmittiń nyshany bolyp tabylatynyn atap ótti.
Qazaqstan Elshisi Tólejan Barlybaev táýelsizdik jyldaryndaǵy saıası reformalar evolıýsııasyn baıandap, el basshylyǵynyń qoǵamdyq jańǵyrtý men áleýmettik baǵdarlanǵan memleketke, parlamentarızm men kóppartııalyqty nyǵaıtýǵa, «halyq únine qulaq asatyn memleket» tujyrymdamasyn iske asyrýǵa baǵyttalǵanyn atap ótti. Beıbit jıyndar týraly jańa zańdy qabyldaý, saıası partııalar úshin elektoraldyq kedergini tómendetý, ulttyq qoǵamdyq senim keńesiniń qyzmeti jáne jalpy azamattyq qoǵam ınstıtýttaryn nyǵaıtý sııaqty sharalar atap ótildi.
Horvatııanyń eks-prezıdenti Stepan Mesıch Qazaqstan basshylyǵynyń aýqymdy reformalardy júzege asyrýǵa jáne memlekettilik ınstıtýttaryn damytýǵa, qazirgi zamanǵy ekonomıka men etnosaralyq kelisim qoǵamyn qurýǵa degen strategııalyq júıeli kózqarasyn joǵary baǵalap, Qazaqstan halqy Assambleıasynyń toleranttylyq pen ózara túsinistik qaǵıdattaryn nyǵaıtýdaǵy mańyzdy rólin erekshe atap ótti.
Elshiliktiń mýzykalyq salonynda Qazaqstan Táýelsizdiginiń 30 jyldyǵyna arnalǵan kameralyq konsert ótti. Klassıkalyq mýzyka vırtýozy – Karnegı hollda jáne Nıý-Iorktegi BUU shtab-páterinde óner kórsetken tanymal vıolonchelıst Eldar Saparaev Abaı óleńderine arnalǵan shyǵarmalarmen jáne Qazaqstan men Horvatııanyń memlekettik ánurandaryn oryndaýmen sharyqtaý shegine jetken Iogann Sebastıan Bahtyń klassıkalyq sıýıtalarymen arnaıy baǵdarlama usyndy.
Qatysýshylarǵa N. Nazarbaevtyń «Táýelsizdik dáýiri» atty kitaptary men buryn horvat tilinde jaryq kórgen Abaı men Ál-Farabıdiń shyǵarmalar jınaqtary syıǵa tartyldy.