Atyraýda áýesqoı balyqshylar Jaıyq ózenine qatqan muz ústinde «Jerusalema» áýenine bıledi, dep habarlaıdy Egemen.kz.
Budan buryn Prezıdent Qasym-Jomart Toqaev Úkimettiń keńeıtilgen otyrysynda Jaıyq ózeniniń ekologııalyq ahýalyna alańdaýshylyq bildirgen edi. Memleket basshysynyń bul alańdaýshylyǵyna atyraýlyq jergilikti belsendiler qoldaý kórsetti. Solardyń biri Jandos Álımaǵanbetov Jaıyq ózeniniń sýy ortaıyp, ekologııalyq apattyń aldynda turǵanyna qatysty pikirimen bólisti.
«Biz muz ústinde «Jerusalema» áýenine bıleý arqyly Jaıyq ózenine nazar aýdarýdy jón kórdik. Muz ústindegi bıge Atyraý qalasynyń belsendi turǵyndary, @caspian_fishermen_atyrau tobynyń balyqshylary men eriktiler qatysty. Osyndaı erekshe ádispen batys aımaqtaǵy turǵyndardyń tirshilik nárine aınalǵan ózenge degen janashyrlyǵymyzdy bildirýdi kózdedik» deıdi ol.
Atyraýlyq jastar Jaıyq ózenine kórshi eldegi kóp bóget qaýip tóndiredi dep sanaıdy.
«Qazaqstan Respýblıkasynyń Prezıdenti Qasym-Jomart Toqaev Úkimettiń keńeıtilgen otyrysynda ózenniń ekojúıesin saqtaý máselesin kóterdi. Biz jaqyn arada Jaıyq ózeniniń arnasy tolǵanyn qalaımyz» deıdi atyraýlyq áýesqoı balyqshylar.