Eýrazııa Ulttyq ýnıversıtetinde «Salyq Zımanov: azamat, ǵalym, memleket jáne qoǵam qaıratkeri» taqyrybynda respýblıkalyq ǵylymı-praktıkalyq konferensııa ótti.
Konferensııany Premer-Mınıstrdiń orynbasary Eraly Toǵjanov Memleket basshysy Qasym-Jomart Toqaevtyń quttyqtaý sózimen ashty.
Quttyqtaýda «Búgin asa kórnekti ǵalym, akademık Salyq Zımanovtyń týǵanyna 100 jyl toldy. Bul – otandyq zań ǵylymy ǵana emes, búkil elimiz úshin aıtýly kún.
Salyq Zımanuly Táýelsiz Qazaqstannyń quqyqtyq negizderin qalyptastyrýǵa orasan zor eńbek sińirdi. Ol «Memlekettik egemendik týraly» deklarasııany, «Qazaqstan Respýblıkasynyń memlekettik táýelsizdigi týraly» konstıtýsııalyq zańdy, alǵashqy Ata Zańymyzdy ázirleýge atsalysty. Sondaı-aq Qazaqstandaǵy parlamentarızm ınstıtýtyn damytýǵa aıryqsha úles qosty.
Áıgili ǵalym quqyq salasynyń qyr-syryna tereń boılap, taǵylymdy eńbekter jazyp qaldyrdy. Ásirese, elimizdiń saıası jáne quqyqtyq damý tarıhy, bıler ınstıtýty sııaqty tyń taqyryptardy tereń zerttedi. Onyń mol murasy aldaǵy ýaqytta da el ıgiligine aınala beretini anyq.
Salyq Zımanuly ulaǵatty ustaz retinde kóptegen bilikti zańgerdi tárbıelep ósirdi. Onyń shákirtteri el ekonomıkasynyń túrli salasynda tabysty eńbek etip júr.
Dúıim zańger-ǵalymdar qoǵamdastyǵyna málim Salyq Zımanovtyń mereıtoıy Táýelsizdigimizdiń 30 jyldyǵymen tuspa-tus kelip otyr. Munyń sımvoldyq máni zor. Týǵan eline qaltqysyz qyzmet etken Salyq Zımanovtyń ǵıbratty ǵumyry – jas urpaqqa árdaıym úlgi-ónege.
Konferensııanyń jumysy tabysty bolsyn! Egemen elimiz órkendeı bersin!» delingen.
О́z kezeginde Premer-Mınıstrdiń orynbasary Eraly Toǵjanov akademık S.Zımanovtyń elimizdiń zań bilimi men zań ǵylymynyń qalyptasýy men damýyna jáne egemen, demokratııalyq memleketimizdiń órkendeýine qosqan baǵa jetpes úlesin erekshe atap ótti. Onyń aıtýynsha, Salyq Zımanovtyń Táýelsiz Qazaqstannyń quqyqtyq júıesin qalyptastyrýǵa qosqan úlesi zor. Qazaqstannyń ulttyq memlekettiliginiń qalyptasý tarıhy salasyndaǵy iri zertteý eńbekteri onyń óz dáýiriniń iri tulǵasy ekenin dáleldeıdi. «Ol ózin ortaq iske salyp, bar kúsh-qaıratyn óz eliniń damýyna jumsady, óz halqyna adal jáne janqııarlyqpen qyzmet etti jáne búginde jańa urpaq úshin naǵyz úlgi bolyp tabylady», dedi Eraly Toǵjanov.
Jıynda Eýrazııa ulttyq ýnıversıtetiniń rektory Erlan Sydyqov táýelsizdiktiń ornyǵýyna, quqyqtyq memleket bolyp qalyptasýymyzǵa ólsheýsiz úles qosqan tulǵanyń ǵasyrlyq mereıtoıy ulttyq ýnıversıtettiń 25 jyldyǵymen tuspa-tus kelip otyrǵanyn atap ótti.
Ǵylymı-konferensııaǵa onlaın qatysqan Senat depýtattary Muhtar Qul-Muhammed, Altynbek Nuhuly, memleket jáne qoǵam qaıratkeri Qýanysh Sultanov, Ulttyq ǵylym akademııasynyń prezıdenti Murat Jurynov akademık Salyq Zımanovtyń memleket jáne qoǵam qaıratkeri retindegi daralyǵyn aıtyp, ǵalymnyń Qazaqstan zańdarynyń negizin qalaýdaǵy eren eńbekterin erekshe atap ótti.
Sondaı-aq basqosýda Konstıtýsııalyq Keńestiń Tóraǵasy Qaırat Mámıdiń, Joǵarǵy sot Tóraǵasy Jaqyp Asanov pen Ádilet mınıstri Marat Beketaevtyń quttyqtaýlary oqyldy.
Respýblıkalyq konferensııada akademık týraly sóz alǵan ǵalymdar men qonaqtar Salyq Zımanulynyń el egemendiginiń bastaýynda turǵan asa kórnekti qazaqstandyq quqyqtanýshy ǵalym bolǵanyn, onyń qazaqstandyq quqyqtaný tarıhynyń negizin qalaǵanyn, tyń ıdeıalardy izdestirýde shákirtterine shynaıy úlgi bola bilgenin jetkizdi.
Konferensııa sheńberinde L.N.Gýmılev atyndaǵy Eýrazııa ulttyq ýnıversıtetiniń zań fakýltetinde akademık Salyq Zımanov atyndaǵy aýdıtorııa ashylyp, ǵalymnyń ǵylymı eńbekteri men ómirbaıanynyń fotomaterıaldar kórmesi uıymdastyryldy.