Qazaqstandyq kásipqoı boksshy Qanat Islam AQSh-tyń Maıamı qalasynda óziniń kezekti jekpe-jegin ótkizip, ekvadorlyq qarsylasyn jetinshi raýndta nokaýtqa jiberdi.
Birinshi jartylaı orta salmaqta judyryqtasatyn qandasymyz áý basta 33 jastaǵy ganalyq boksshy Obodaı Saımen (35-3-1, 26 KO) judyryqtasýy tıis bolǵan. Alaıda jekpe-jekke bir kún qalǵanda Obodaıdyń sharshy alańǵa shyqpaıtyny belgili bolyp, Qanat 27 jastaǵy ekvadorlyq boksshy Djeıson Mındamen (14-4-1, 8 KO) jekpe-jek ótkizdi.
On raýndqa eseptelgen jekpe-jek jetinshi raýndta aıaqtaldy. Aldymen Qanat Islam qarsylasyn tórtinshi raýndta bir ret nokdaýnǵa jiberse, jetinshi raýndta taǵy da sol jaǵdaı qaıtalandy. Tez es jıyp úlgergen Mında jekpe-jekti qaıta jalǵastyrýǵa daıyn ekenin tóreshige uqtyrdy. Biraq kóp uzamaı qazaqstandyq boksshy qarsylasyn aýyr nokaýtqa túsirip, jekpe-jekti merziminen buryn aıaqtady.
Jerlesimiz 14 aı úzilisten keıin úlken rıngke qaıta oralyp, mansabyndaǵy jarqyn jeńisin qaıta jalǵady. Aıta keteıik, Qanat Islam eń keıingi kezdesýin 2019 jyly Almatyda ótkizip, WBO International tıtýly úshin aıqasta namıbııalyq Ýolter Kaýtondokvany (18-2, 17 KO) jeńgen edi.