Mádenıet jáne sport mınıstrligi men «Áziret Sultan» memlekettik tarıhı-mádenı qoryq-mýzeıiniń uıymdastyrýymen «Táýelsizdik jáne Túrkistan taǵylymy» taqyrybynda respýblıkalyq ǵylymı-tájirıbelik konferensııa ótti. Mártebeli jıynǵa Jambyl Artyqbaev, Bereket Káribaev, Haziretáli Tursyn syndy maman tarıhshylar, elbasytanýshy Seıdýlla Sadyqov, teolog ǵalym Dosaı Kenjetaı jáne basqa zııalylar, mýzeı qyzmetkerleri men stýdentter qatysty.
Sharany ashyp, sóz alǵan qoryq-mýzeı dırektory Nurbolat Ahmetjanov: «Bul konferensııa Táýelsizdigimizdiń 30 jyldyǵyna oraı ótkizilip otyr. Egemendikke qol jetkizgen jyldardan bastap elimizdegi tarıhı-mádenı oryndar qaıta túlep, ejelgi muralar qalpyna kele bastady. Sonyń biri – Túrkistan qalasyndaǵy qasıetti nysandar. Atalmysh ǵylymı shara 30 jylda qol jetkizgen jetistikterimiz ben zertteý eńbekterimizge, sonymen qatar kóne muralardyń ashylýy tıis rýhanı betterin zerttep-zerdeleýge tyń serpin berip, ǵalymdarymyzdyń pikirlerimen tolyǵa túsetinine senimimiz mol. Konferensııaǵa qatysyp otyrǵan tarıhshy mamandardyń atqarǵan eńbekteri – «Áziret Sultan» memlekettik tarıhı-mádenı qoryq-mýzeıiniń ǵylymı jumystarynyń jandanýyna ólsheýsiz úles qosyp keldi. Osy baǵytta qoryq-mýzeı janynan tarıhı oryndar men tulǵalarǵa arnalǵan kitaptar shyǵarylýda. Taǵy da bir qýanyshty jańalyq – Qoja Ahmet Iаsaýı kesenesinde jerlengen tulǵalar tizimi jańardy. Ǵylymı keńes buǵan deıin belgisiz bolyp kelgen 12 tulǵanyń osynda jerlengeni týraly tarıhı derekterdi tapty. Búgingi basqosý barysynda tyń taqyryptar qozǵalyp, pikir bildiriledi, bul árbir taqyryptyń mazmunyn ashyp, naqtylanýyna jol ashary anyq» dedi.
Basqosý barysynda kóne jáne jańa Túrkistannyń tarıhı damý sabaqtastyǵy, 30 jyl ishinde atqarylǵan jumystar, Elbasy Nursultan Nazarbaevtyń Túrkistan qalasyn damytý jáne tarıhı oryndardy qaıta jańǵyrtý jolyndaǵy serpindi isteri, ulttyq sana, Uly Dala eli uǵymynyń mazmuny, ortaǵasyrlyq qalalardyń zerttelýi men tarıhy, Qoja Ahmet Iаsaýı dúnıetanymynyń máni, arheologııalyq qazba jumystar barysyndaǵy ǵylymı jetistikter, tulǵalar izi qalǵan qasıetti mekendi tanytý baǵytynda órbip, joǵaryda atap ótilgen baǵyttarǵa qatysty baıandamalar tyńdaldy.