Syrdarııa ózeniniń arnasynda muz qatatyn qys pen seń júre bastaıtyn kóktemde oblystaǵy tıisti qurylymdar da, ózen jaǵalaýyndaǵy jurt ta qarbalasqa túsedi. Ońtústik aýmaqta kún jylynǵan sátte lyqsyp kelgen mol sý kóktem kesh shyǵatyn Qarmaqshy, Qazaly aýdandary aýmaǵynda arnadan asyp ketip, eldi ábigerge salatyn kezi de az emes.
Osydan da jyl saıyn jergilikti ákimdikter, tótenshe jaǵdaılar qyzmeti jospar túzip, darııa arnasy turaqty baqylaýǵa alynady. Osy jyly da 2020-2021 jyldardaǵy qysqy-kóktemgi kezeńde Syrdarııa ózenindegi mol sýdy qaýipsiz ótkizýge daıyndyqtyń jospary bekitilgen.
Josparǵa sáıkes sý tasqynyna qarsy is-sharalarǵa oblys bıýdjetinen 266,3 mln teńge bólingen. Onyń 138,2 mln teńgesi qorǵanys bógetterin jóndeý men qalpyna keltirýge arnalsa, 10 mln teńgesi muz jarýǵa qaralǵan. Bes mıllıon teńgege jýyq qarjyǵa qaptar satyp alý josparlanyp, "Qazavıaqutqarý"AQ qyzmetine 113,3 mln teńge qaralyp otyr.
Sý tasqynyna qarsy jumystarǵa 68,6 tonna janar jaǵar maı, 154 590 dana qap jáne basqa da materıaldyq-tehnıkalyq quraldar qory qalyptastyrylǵan.
Apta basynda oblys ákimi Gúlshara Ábdiqalyqova darııany tikushaq arqyly áýeden baqylady. Oblystyq jumyldyrý daıyndyǵy basqarmasynyń basshysy Medet Ýsaın oblys basshysyna arnadaǵy qazirgi ahýal týraly baıandady.
Bıyl qysta darııanyń oblys aýmaǵyndaǵy bóliginde 10-55 santımetr aralyǵynda muz qatty. Aýa raıynyń jylýyna baılanysty dál qazir Shıeli aýdany Qarǵaly eldi mekeni tusynda muz júrip jatyr. О́zen arnasy júıeli baqylaýǵa alynǵan, – dedi basqarma basshysy.Osydan keıin óńir basshysy jaýapty mekemeler basshylaryna birqatar tapsyrmalar berdi. Onyń ishinde, sý basý qaýpi joǵary aımaqtarda ózen boıyna táýlik boıy kezekshilik uıymdastyrýdy jáne arnaıy tehnıkasy bar jaýapty mekemelerdi bekitýdi tapsyrdy.