Túrkistanda Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti jáne kásipkerler palatasynyń birlesip uıymdastyrýymen «Bıznesti jáne ınvestısııany qorǵaý» taqyrybynda májilis ótti.
Bıznes ortadaǵy ózekti máseleler talqylanǵan alqaly jıynǵa agenttiktiń oblys boıynsha departamenti basshysy Hakım Kóshqalıev, oblystaǵy Kásipkerler palatasynyń dırektory Tımýr Nahıpbekov, jergilikti atqarýshy jáne aýmaqtyq organdar men bıznes-qaýymdastyqtyń ókilderi qatysty. Otandyq jáne sheteldik ınvestorlar úshin qolaıly jaǵdaı jasaý jáne kásipkerlerdiń quqyqtary men zańdy múddelerin qorǵaý barysynda paıda bolatyn problemalyq máseleler talqylanǵan alqaly jıynda H.Kóshqalıev el ekonomıkasyna ınvestısııalardyń kelýin jeńildetý, bıýrokratııa tártipterin jáne sybaılas jemqorlyq derekterin boldyrmaý maqsatynda Agenttiktiń bastamasymen «Protecting Business and Investments» jobasy qarqyndy júzege asyrylyp jatqandyǵyn baıandady. Joba aıasynda búginde departamentpen jalpy somasy 621 mlrd teńge bolatyn 49 ınvestısııalyq joba súıemeldeýge alynǵandyǵyn jetkizdi. Sondaı-aq departament basshysynyń birinshi orynbasary Mıras Qarǵabaı atalǵan joba sheńberinde túrkistandyq jeke kásipkerdiń 13 jyl boıy sheshilmeı júrgen sharýasy 7 kún ishinde sheshimin tapqandyǵyn jáne byltyr jalpy sany 15 kásipkerlik sýbektisiniń quqyqtary qalpyna keltirilip, shaǵyn jáne orta kásipkerlik bıznesine zańsyz aralasýdyń 18 deregi áshkerelený arqyly jergilikti atqarýshy organdardan 10 laýazymdy tulǵa sot úkimimen sotty bolǵanyn málimdedi.
Jıyn sońynda kásipkerliktiń damýyna kedergi keltiretin ózekti problemalyq máseleler men karantın rejıminde saqtalýy tıis negizgi shekteýler ortaǵa salynyp, óńirdegi kásipkerlerdiń usynys-pikirleri tyńdaldy.