Qazirgi tańda Qazaqstan qalalarynyń áleýmettik ózekti problemalarynyń biri aýlalardaǵy avtomobıl kóliginiń júktemesi bolyp tabylady. Bul rette kóppáterli úıler aýlasyndaǵy kólikterdiń retsiz shoǵyrlanýy turǵyndarǵa kóptegen qolaısyzdyqtar ákelip júr. Avtokólikter arnaıy oryndarǵa ǵana emes, sondaı-aq, balalarǵa arnalǵan oıyn alańdaryna, kógal-gúlzarlarǵa, turǵyn úılerdiń kireberisterine, joldyń kólik júretin bóligine jáne trotýarlarǵa qoıylyp jatady. Bul jaıt turǵyndardyń zańdy narazylyqtaryn týdyrýda.
Qazirgi tańda Qazaqstan qalalarynyń áleýmettik ózekti problemalarynyń biri aýlalardaǵy avtomobıl kóliginiń júktemesi bolyp tabylady. Bul rette kóppáterli úıler aýlasyndaǵy kólikterdiń retsiz shoǵyrlanýy turǵyndarǵa kóptegen qolaısyzdyqtar ákelip júr. Avtokólikter arnaıy oryndarǵa ǵana emes, sondaı-aq, balalarǵa arnalǵan oıyn alańdaryna, kógal-gúlzarlarǵa, turǵyn úılerdiń kireberisterine, joldyń kólik júretin bóligine jáne trotýarlarǵa qoıylyp jatady. Bul jaıt turǵyndardyń zańdy narazylyqtaryn týdyrýda.
Avtokólikterdiń aýlalarda kóptep shoǵyrlanýy kommýnaldyq qyzmetter úshin, onyń ishinde qoqys shyǵarý, «jedel járdem» jáne órt sóndirý kólikteri, taksıler, analardyń besik-arbalarmen qozǵalysy úshin kúrdeli problemaǵa aınalyp otyr. Qar jınaıtyn tehnıkalardyń da aýlalardan qar shyǵarýǵa múmkindikteri de shekteýli. Avtomobılderge tolyp turýynyń saldarynan aýlalardaǵy jol-kólik oqıǵalarynyń sany da ulǵaıýda. Bóten bireýdiń avtokóligin syryp ketken jaǵdaıda júrgizýshi oqıǵa bolǵan jerden op-ońaı ketip qala alady.
Avtokólikterdiń aýlalarda stıhııaly túrde shoǵyrlanýynyń negizgi sebebi, aýlalar mańynda avtoturaqqa arnalǵan jerlerdiń jetispeýshiligi bolyp tabylatyny anyq. Sonymen birge, kólikterin aqyly avtoturaq oryndaryna qoıýǵa múmkindigi joq turǵyndarmen qosa, avtoturaqta orny barlar da kóp jaǵdaıda kólikterin aýlalarǵa qoıyp ketedi. Esesine qaladaǵy kóptegen avtoturaqtar jarym-jartylaı bos turady. Aýlalarda jyldar boıy qaraýsyz turyp qalǵan kólik quraldary da joq emes. Bul másele de problemany kúrdelendire túsip otyr. Ýaqyt ótken saıyn atalǵan másele qıyndaı túspese, ońaılamaıtyny taǵy belgili.
Osyǵan baılanysty avtokólikterdiń aýlalarda kóptep shoǵyrlanýy máselesin sheshý úshin olardy turaqqa qoıýdyń jeke erejesi ázirlenýi tıis dep bilemiz. Avtokólikterdi balalarǵa arnalǵan oıyn alańdaryna, kógaldarǵa qoıý tártibiniń oryndalýyna baqylaýdyń da kúsheıtilgeni jón. Tutastaı alǵanda, bul problemany túbegeıli sheshýdiń túrli joldaryn qarastyrmaı bolmaıdy.
Tursynbek О́MIRZAQOV,
Májilis depýtaty.