Keńeste Prezıdent usynǵan usynys-talaptardyń basty ereksheligi – olardyń barlyǵy eń aldymen qarapaıym halyqtyń ózekti máselelerin sheshýge baǵyttalǵan.
Prezıdent aýyldardaǵy turǵyn úı qurylysynyń kólemin ulǵaıtý máselesin kóterdi. Bul úıler eń aldymen aýyl muǵalimderi, dárigerleri jáne aýyldyń áleýmettik salasynyń basqa da qyzmetkerlerine arnalmaq.
Memleket basshysy ekonomıka týraly aıta kelip, óńirlik áleýmettik-kásipkerlik korporasııalar aımaqtardyń ál-aýqatyn damytýdyń tetikterine aınalýy tıis ekenin, sol úshin olar kásipkerlermen básekeles bolmaýy kerektigin de eskertti. Alqaly jıynda «jasyl ekonomıkaǵa» kóshýdiń, balamaly energetıkany engizýdiń mańyzdylyǵy da keńinen sóz boldy.
Kadrlardy daıarlaýdy damytý máselelerine qatysty kózqarasyn bildirgende Qasym-Jomart Kemeluly álemdi ábigerge salǵan pandemııanyń bilim berý jáne densaýlyq saqtaý salalarynda kadr daıarlaýǵa basqasha baǵyt qajettigin atap ótti.
Sondaı-aq Memleket basshysy osy mamandyqtar boıynsha oqıtyn stýdentterdiń stıpendııalaryn, muǵalimder men dárigerlerdiń jalaqysyn kóterýdiń mańyzdylyǵyn ashyp kórsetti.
Memleket basshysynyń qarapaıym halyqtyń qamy úshin jasaǵan taǵy bir qadamy – Úkimetke jáne ákimderge múmkindigi shekteýli jandardyń jaıly ómir súrýi úshin barlyq qajetti jaǵdaıdy jasaýdy, olarǵa ǵımarattar men kóliktiń qoljetimdiligin qamtamasyz etýdi tapsyrýy boldy. Keńeste Prezıdent áıelderge qarsy turmystyq zorlyq-zombylyq pen qumar oıyndarǵa qarsy kúresti kúsheıtý máselesine de erekshe den qoıyp, adam quqyn qorǵaýda erekshe rólge ıe advokatýra salasynyń kúsheıýine erekshe toqtaldy.
Ulttyq keńestiń osy otyrysynda aıtylǵan usynystar elimizdegi saıası reformalarǵa da tyń serpilis bolary sózsiz. Sebebi alqaly basqosýda jergilikti ózin-ózi basqarýdy damytý jónindegi jumystardyń jańa qarqyn alatyny aıtyldy. Aýyl jáne aýyldyq okrýg ákimderin saılaýdyń 2021 jyldyń tamyz-jeltoqsan, al aýdan ákimderin saılaýdyń 2024 jylǵa belgilengeni aldymyzda aýqymdy is-sharalar atqarylatynyn ańǵartady.
Prezıdent aýyl sharýashylyǵy maqsatyndaǵy jerlerdi sheteldik azamattar men sheteldik qatysýy bar zańdy tulǵalarǵa satý jáne jalǵa berý máselelerine túpkilikti núkte qoıdy. Jıynda Memleket basshysy osy jyldyń 25 naýryzynda jumysyn bastaıtyn Jer komıssııasyn qurýdy tapsyrdy. Bul komıssııa jer máselelerin zańnamalyq retteý boıynsha barlyq usynystardy tyńǵylyqty zerdelep, ázirleıtin organ bolmaq. Keńeste el damýynyń áleýmettik-ekonomıkalyq máseleleriniń ótkir ári ashyq talqylanǵany Keńes músheleri úshin de, qarapaıym halyq múddesi úshin de óte qajetti.
Tóleýtaı RAQYMBEKOV,
«Ulttyq agrarlyq ǵylymı-bilim berý ortalyǵy» KeAQ basqarma tóraǵasy, Ulttyq qoǵamdyq senim keńesiniń múshesi