Parlamentarızm ınstıtýtynyń dırektory bolyp, burynǵy depýtat Mansurhan Mahambetov taǵaıyndaldy, dep habarlaıdy Egemen.kz Májilistiń baspasóz qyzmetine silteme jasap.
Mansurhan Mahambetov – prokýratýra organdarynda, onyń ishinde óńirlerde jumys istegen, tájirıbesi mol kásibı zańger. 1965 jyly týǵan. Qaraǵandy memlekettik ýnıversıtetin «Quqyqtaný» mamandyǵy boıynsha bitirgen.
Adamnyń, azamattyń quqyqtary men bostandyqtarynyń, zańdy tulǵalar men memleket múddeleriniń saqtalýyn qadaǵalaý jónindegi prokýror, mamandandyrylǵan tabıǵatty qorǵaý prokýrory, Qazaqstan Respýblıkasy Bas prokýratýrasy janyndaǵy Quqyq qorǵaý organdary akademııasy basqarmasynyń aǵa prokýrory qyzmetterin atqarǵan.
Májilistiń VI shaqyrylym depýtaty kezinde Zańnama jáne sot-quqyqtyq reforma komıtetiniń múshesi, sondaı-aq, Ekologııa máseleleri jáne tabıǵat paıdalaný komıtetiniń múshesi boldy. Parlamentarızm Instıtýty Memleket Basshysy Qasym-Jomart Toqaevtyń tıisti tapsyrmasyn oryndaý maqsatynda quryldy.
Qurylymnyń qyzmeti zańnamanyń tıimdiligin taldaýdy qamtamasyz etý arqyly Qazaqstan Respýblıkasynda parlamentarızmdi damytýǵa jáne onyń tıimdiligin arttyrýǵa baǵyttalǵan.