2021 jyldyń qańtar aıynda otandyq áýe kompanııalarynyń tabysy 19,6 mlrd teńgeni qurap, aldyńǵy jylmen salystyrǵanda 40,8 paıyzǵa quldyraý baıqalǵan.
Atalǵan somanyń 17,9 mıllıardy jolaýshylar tasymalynan tússe, 1,7 mıllıard teńge – júk tasymalyn júzege asyrýdan túsken paıda. 2020 jyly qańtar aıynda bul saladaǵy tabys 33,1 mlrd teńgeni qurap, 2019-dyń basymen salystyrǵanda 31,3 paıyz ósim kórsetken edi. Byltyrǵy qatań shekteýlerdiń áýe kompanııalaryna ońaı tımegenin osy bir aıyrmashylyqtan-aq ońaı ańǵarýǵa bolatyndaı.
Osy jyldyń qańtar aıynyń ózinde el aýmaǵynda 592,1 myń adam tasymaldanyp, jalpy jolaýshylar aǵyny 845,7 mln jolaýshy-shaqyrymdy quraǵan. Bir aıda tasymaldanǵan júk kólemi 2,5 myń tonna, al júk aınalymy 5,4 mln tonna-shaqyrym kórsetkishine ıe.
Finprom.kz aqparaty boıynsha, «Eır Astana» áýe kompanııasynyń reısterdi óz ýaqytynda oryndaý kórsetkishi qańtar aıynda 90,9 paıyz bolǵan. Kompanııa byltyr óz ýaqytynda reıs oryndaý kórsetkishin 87,6 paıyz dep málimdegen.