Búgin S.Amanjolov atyndaǵy Shyǵys Qazaqstan ýnıversıtetinde «Taza qol» músininiń tusaýkeseri men «Orep University» keńsesiniń ashylýy ótti, dep habarlaıdy Egemen.kz
Endi stýdentter «Orep University» keńsesinde oqýyna qatysty kez-kelgen suraqqa op-ońaı jaýap ala alady. Keńsede qashyqtan oqytý portaly, rektor blogy, senim jáshikteri, senim telefondary, «Sybaılas jemqorlyqqa qarsy is-qımyl» onlaın portaly qyzmet kórsetedi. Ol úshin stýdent-keńesshiler de taǵaıyndalǵan. Olardyń qatarynda atalmysh oqý orynnyń stýdenti Artem Borovıkov ta bar. Aıta keterligi, ol 1 naýryzda Álııa Nazarbaeva quryltaıshysy bolyp tabylatyn «ADAM BOL AWARDS» birinshi jahandyq qazaqstandyq syılyǵynyń laýreaty jáne jeńimpazy atandy. Oǵan «MYQTY ADAM» ataǵy berildi.
Oqý ornynyń qabyrǵasynda ótken bul saltanatty sharaǵa ShQO boıynsha sybaılas jemqorlyqqa qarsy qyzmet departamentiniń basshysy Erlan Naǵashybaıuly jáne zııaly qaýym ókilderi qatysty.
– «Taza qol» músini byltyr ǵana joba júzinde tanystyrylǵan edi. Mine, oıdaǵy dúnıe iske asyryldy. «Stýdentter – bizdiń bolashaǵymyz» degendi jıi aıtamyz. Mundaı bastamanyń tárbıelik máni orasan. Endigisinde elimizdegi ózge de ýnıversıtter osy qadamdy jalǵastyrsa eken, – dedi Erlan Jalmaǵambet.
Ýnıversıtet rektory Muhtar Tólegenniń aıtýynsha, stýdentterdiń ótinish-shaǵymyna qashan da túsinistikpen qaraıdy. Al shyny qorshaýly «Open university» kabınetinde ózine-ózi qyzmet etý múmkindigi qarastyrylypty. Ata-analar kelip dekanatqa baılanysqa shyqqylary kelse, kezek kútpeı-aq osy jerde týyndaǵan másele tóńireginde erkin dıalog qura alady.
Budan soń qonaqtar sırek kitaptar qorymen tanysty, «Abaıtaný» ǵylymı-zertteý ınstıtýtyna bas suqty. Bul rette oblystyq «Halıfa Altaı» meshitiniń bas ımamy Ermek qajy Muqataı, qalalyq mádenıet, ishki saıasat, jáne tilderdi damytý bóliminiń basshysy Qalqaman Sarın, belgili ornıtolog Borıs Sherbakov syndy meımandar bilim oshaǵynyń bastamasyna oń baǵasyn berdi.