Izgilik pen meıirim álemdi qutqarady. Qoǵamda ózgeniń ómiri úshin óz basyn qaterge tigetin beıbit kúnniń qaharmandary az emes. Olardyń eńbegin elep, basqalarǵa úlgi etý jaqsylyqqa jol ashady. Alǵashqy qazaqstandyq «Adam Bol Awards» syılyǵy ómirde erlikke árdaıym oryn bar ekenin óz isimen shynaıy kórsete bilgen jandarǵa tapsyryldy.
«Adam Bol Awards» qazaqstandyq júldesi eshqandaı qıyndyqtan qoryqpaı, naǵyz batyrlyqtyń eren úlgisin kórsetken azamattarǵa arnalǵan. Júlde laýreattary adam boıyndaǵy márttik, jomarttyq, erlik, meıirim men ádildik, mahabbat pen danalyq, senim men úmit sııaqty asyl qasıetterimen erekshelendi. Alaýlaǵan ottyń ishinen alty balanyń ómirin arashalap qalǵan Dáýren Rymqulov týraly jýrnalıster qaýymy jarysa jazǵan bolatyn. Ataýly syılyqqa ıe bolǵandardyń ishinde ol da bar. Sondaı-aq janyp jatqan angardan 22 ıtti aman alyp shyǵyp, ózi kók tútinge ýlanyp aýrýhanadan bir-aq shyqqan haıýanattar quqyn qorǵaýshy Sergeı Snegırev te laýreattar qatarynan tabyldy.
Kópshiliktiń daýys berýi men sarapshylar keńesiniń sheshimi boıynsha jeńimpaz atanǵan Nadır Omarǵazıev, Imanǵalı Baımyrza, Andreı Petrov, Aqbota Amanǵalıeva, Erjan Amarhanov, Ardaq Baımanasov, Artem Borovıkov, Aleksandr Shahov, Álıakbar Iýldashev, Aleksandr Jumabaev sekildi azamattardyń árbiri qurmetke laıyq. Qoǵamnyń san salasynda eńbek ete júrip, aınalasyna jarqyn úlgi kórsetken olardyń ishinde mektep oqýshysy da bar.
Jeńimpazdardy marapattaý rásiminde sóz alǵan Almaty qalasynyń ákimi Baqytjan Saǵyntaev: «Qaharmandar aramyzda júr. Adamǵa jaqsylyq jasaý úshin kóp nárseniń qajeti joq, kishkentaı meıirim bolsa jetkilikti. Syılyq laýreattarynyń árqaısysy – qurmetke laıyq ári qoǵamǵa qyzmet etýdiń, janqııarlyq pen batyldyqtyń úlgisin kórsetken jandar», dep atap ótti.
Jobanyń quryltaıshysy – qoǵam qaıratkeri, «Jandaný álemi» qaıyrymdylyq qorynyń negizin qalaýshy Álııa Nazarbaeva. Laýreattardy qoldap, jyly lebiz bildirý úshin marapattaý keshine Qazaqstannyń eń jas kompozıtory Nurálı Beıseqoja, Mezzo toby, «Slavıanskıı bazar v Vıtebske» baıqaýynyń jeńimpazy Ámre, Qazaqstannyń eńbek sińirgen qaıratkeri Maıra Muhammedqyzy, Qazaqstannyń eńbek sińirgen qaıratkeri Súndet Baıǵojın jáne taǵy basqalar qatysty.
ALMATY