Qurlyqtyq hokkeı lıgasynyń (QHL) pleı-off kezeńine shyqqan elordanyń «Barysy» Gagarın kýbogy jolyndaǵy jarystyń 1/8 fınalynda Magnıtogorskiniń «Metallýrg» komandasymen kezdesip, syrt aıdynda ótken alǵashqy oıynda iri eseppen jeńilip qaldy.
Jalpy eki komanda arasyndaǵy match QHL-diń osy maýsymdaǵy eń nátıjeli ári eń tartysty oıynynyń biri boldy dep aıtýǵa tolyq negiz bar. О́ıtkeni tarazy basy teńselip turǵan kezdesýde hokkeıshiler 11 shaıba soqty. Birinshi kezeńniń 37-sekýndynda aıdyn ıelerinen Egor Korobkın esep ashqanymen, kezeń sońyna deıin jerlesterimiz úsh gol soǵyp úlgerdi. «Barys» sapynan K.Panıýkov, R.Starchenko jáne D.Dıs mergendigimen kózge tústi. Ekinshi kezeńde «Metallýrgtiń» qarqyny qatty boldy. Aınaldyrǵan 12 mınýttyń ishinde Henrık Karlsson qorǵaǵan qaqpaǵa jaýapsyz tórt shaıba salyp, esepte qaıtadan alǵa shyqty. Úziliske deıin Fılıp Varone mergendik tanytyp, tablodaǵy kórsetkishti 5:4-ke qysqartty.
Kezdesýdiń sońǵy bóliginde jerlesterimiz jaǵdaıdy túzeý úshin baryn salǵanymen, báribir kózdegen nátıjesine qol jetkize almady. Úshinshi kezeńde de myqtylyq tanytqan «Metallýrg» oıynshylary qaqpamyzǵa taǵy da eki shaıba soǵyp, kezdesýdiń núktesin qoıdy. Qorytyndy esep – 7:4. Eki komanda arasyndaǵy ekinshi kezdesý de búgin Magnıtogorskidegi «Metallýrg Arenada» ótedi.