Qazaqstan óńirlerinde respýblıkalyq mańyzy bar joldarǵa aqyly júıe engizý boıynsha qoǵamdyq tyńdaýlar ótkizý jalǵasýda. «QazAvtoJol» ulttyq kompanııasy men jergilikti atqarýshy organdardyń ókilderi jáne qoǵam belsendileri birlesip, atalǵan máseleni jiti talqylaýda.
2021 jyldyń qańtarynan bastap Jambyl, Almaty, Qyzylorda, Atyraý, Mańǵystaý men Túrkistan oblystarynda avtomobıl joldarynyń 7 ýchaskesi boıynsha 35 eldimekende qoǵamdyq tyńdaý ótkizilgen. Ulttyq operator ókilderi júıeni engizý kezeńderi, jeńildikter, tarıfter, sondaı-aq tólemniń artyqshylyqtary týraly halyqty habardar etti.
Aqyly avtomobıl joldary jelisin keńeıtýdiń uzaq merzimdi álemdik tájirıbesi Qazaqstanda óziniń tıimdiligin dáleldedi. Qazirgi tańda elimizde 4 aqyly ýchaske jumys isteýde: «Nur-Sultan – Shýchınsk», «Nur-Sultan – Temirtaý», «Almaty – Qapshaǵaı» jáne «Almaty – Qorǵas». Bıyl aqyly joldar júıesin 5,8 myń shaqyrym jolǵa engizý kózdelgen.
Jalpy, 2020-2025 jyldarǵa arnalǵan ınfraqurylymdy damytýdyń «Nurly jol» memlekettik baǵdarlamasy aıasynda 11 myń shaqyrym avtomobıl jolyn aqyly etý josparlanýda.
Qoǵamdyq tyńdaýlar Aqmola, Pavlodar, Shyǵys Qazaqstan jáne Qostanaı oblystarynda, sondaı-aq Nur-Sultan qalasynda ótkiziledi dep kózdelip otyr.