Altynbek Nýhuly Naýryz merekesin toılaý kúnderinde elge oralǵan qandastardyń otbasylary men basqa etnos ókilderine qazaqstandyq pasportty saltanatty tapsyrý rásimin dástúrge aınaldyrýdy usynyp otyr. Bul týraly depýtat Úkimetke joldaǵan saýalynda aıtty, dep habarlaıdy Egemen.kz.
Altynbek Nýhuly áz Naýryzdy toılaýǵa qatysty birneshe usynysyn jarııa etti. Senat depýtaty eriktilerdiń belsendi qatysýymen ótetin «Naýryz meıirimi» jalpyulttyq aksııasy sekildi sharalarynyń mańyzyn atap ótti.
Depýtattyń pikirinshe, Naýryzdyń ıdeıalyq mazmunyn balalar men jastar aýdıtorııasyna áleýmettik jeli jáne ózge de keńistiktegi sharalar arqyly sińirýdiń máni aıryqsha.
Senator óz saýalynda ulttyq qundylyqtardyń nasıhaty men rýhanı damý, memlekettik tildiń mártebesin arttyrý taqyrybyndaǵy ózekti oılaryn ortaǵa saldy.
«Zaman talabymen úndesetin buqaralyq sharalardy óskeleń urpaqqa, qasterli Otanyń men otbasyńa, týǵan topyraǵyna súıispenshilikpen nasıhattaý mańyzdy. Sol úshin jas urpaqqa ekologııalyq tárbıe berý úshin aýmaqtardy abattandyrý, bulaqtardyń kózin ashý men aǵash otyrǵyzýdy dástúrge aınaldyrý qajet. Ońtústik óńirlerde Naýryz merekesinde jáne mundaı aksııany qolaıly klımat keshirek keletin soltústik óńirlerde keıinirek uıymdastyrý qajet dep sanaımyz», - dedi Altynbek Nýhuly.