Shýaqty kóktem, shuǵylaly mezet, shabytty shaq... Sulýlyq pen izgilik, mahabbat pen meıirim, náziktik pen tazalyq, jańarý men jańǵyrý maýsymy ashyq dep jarııalanady! Kóktem keldi! Erke kóktem esi-dertimizdi alyp, barlyq ıgilik pen jaqsylyq ataýlydan enshi usynyp tur. El kóńili serpilgen. Emen-jarqyn. Myrza kóktem, mereıli kóktem, márt kóktem. Qadirli kóktem, qasterli ýaqyt.
Táýelsizdigimizdiń otyzynshy kóktemi. Ár kóktem saıyn janymyz jaqsylyqqa baııdy. Árbir kórkem kóktem saıyn kóńilimiz marqaıady. Biz uly murattarǵa umtylamyz. Ár kóktem saıyn jas úmitter búr jarady. Kóktem sulýdaı elitedi, anańdaı aıalaıdy, balańdaı alaqaılaıdy.
O, qudiret, biz kóktem jaıly aıta bastasaq, kóz aldymyzǵa qyz beıneli dúnıe móldirep kelip tura qalatyny nesi eken? Kóktem jaıly bir áńgime bastalsa, onyń sulýlar, áıel jaıyna, áıel-ana jaıyna aýysa beretini neden eken? Kóktemniń alǵashqy qustary – qarlyǵash pen náýrizek kelse, jaýqazyn men báısheshek gúl ashsa, jomart kún jerdiń betin shapaǵatyna bólese, sonyń bárin de tabıǵat áıel úshin jasap jatqandaı áser qaldyratyny qalaı eken?
Kóktem sherýi bastalyp ketti!
Qyrdyń astyna quldyrańdap júgirgen balaqan gúl terip júr, taǵy biri aq qaǵazǵa gúldiń sýretin salyp otyr, ony alýan túske álemeshtep boıaıdy, gúl satatyn dúńgirshekterdiń aldy bosar emes, sonyń bári: balaqaı da, jas jigit te, jasamys ta anaǵa, arýǵa, asyl jarǵa syılyq izdep júr. О́zi de gúlden jaralǵandaı jaratylys ıesine gúl syılamaqqa umtylady. Jaryq dúnıeniń sáýlesin syılaǵan janǵa janyn da usynýǵa ázir.
8 naýryz – Halyqaralyq áıelder kúni. Osy kúnde, osy merekede bir hıkmet bary anyq-aý. 8 – sheksizdik belgisi. Sondyqtan da bolar, osy kún sheksiz rızalyqtyń, sheksiz qurmet pen taǵzymnyń, mahabbat pen meıirimniń, ásemdik pen ádemiliktiń belgisindeı. Ol arý júrektiń, ana júreginiń sımvoly sekildi.
El tarıhynyń este joq eski kezeńderinen bastap, keshegi alasapyran, almaǵaıyp ýaqyttarda, handyq dáýirde, keńestik kezeńde, táýelsizdik zamanynda da azamatpen aldyńǵy shepte qatar turǵan, baıraq ustasqan, baǵan kóterisken, ıyq tiresken, tize qosqan, baryńdy túgendesip, joǵyńdy izdesken, halyq haqysyna qatar qyzmet etisken – arýlar, analar, ardaqtylar, asyldar, aıaýlylarmen birge – ár kún mereke! Ár azamattyń júreginiń tórinde kóktemdeı kórkem bir jan bar!