Jaqynda Ispanııa syrtqy ister mınıstrligi Qyrǵyzstandaǵy oqıǵalarǵa baılanysty resmı Madrıdtiń kózqarasyn bildiretin baspasóz kommıýnıkesin jarııalady, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti. Onda bylaı delinedi:
“Ispanııa úkimeti Qyrǵyzstannyń burynǵy prezıdenti Qurmanbek Bakıevtiń el aýmaǵyn tastap shyǵýǵa múmkindik beretin kelisimdi qaperge alady. Munda ózge de salmaqty halyqaralyq oıynshylardan bólek, EQYU-nyń Is basyndaǵy tóraǵasy ýaqytsha úkimetpen jáne eks-prezıdent Bakıevpen aradaǵy kelisimge qol jetkizý sheńberindegi kelissózder aıasynda sheshýshi ról atqardy. Ispanııa úkimeti eks-prezıdenttiń elden ketýi Qyrǵyzstandaǵy saıası ómirdi qalypty deńgeıge túsirýge yqpal etetin bolady dep úmittenedi”.
Ispanııa úkimeti EQYU Is basyndaǵy tóraǵasynyń Qyrǵyzstandaǵy janjaldy retteý boıynsha kúsh-jigerine qoldaý kórsete otyryp, Q.Saýdabaevtyń osy elge resmı sapary Qyrǵyzstandaǵy saıası jaǵdaıdy qalypqa túsirýge kepildik berý maqsatynda negizgi saıası kúshterdiń qatysýymen bitimgershilik jáne ulttyq únqatysý úderisterin ilgeri jyljytýǵa óziniń senimin bildiretinin de atap aıtady. Bul óz kezeginde belgilengen merzimde saılaý ótkizý jolymen elge qalypty demokratııalyq ahýaldy qaıta oraltýǵa múmkindik berer edi. Baspasóz kommıýnıkesinde Qyrǵyz Respýblıkasy bul mindetti júzege asyrýda Ispanııanyń qoldaýyna úmit arta alatyny da kóldeneń tartylady.
ELDIKTIŃ ÚLKEN ÚLGISI
Qazaqstan Prezıdenti Nursultan Nazarbaevtyń atyna Qazaqstan qyrǵyzdarynyń atynan Sh.Ismaılov hat joldapty. Ol óziniń hatynda bylaı deıdi:
Bizder, Qazaqstanda turatyn qyrǵyzdar Qyrǵyz Respýblıkasynda bolǵan jaǵdaıdy kúızele de, qınala da qabyldadyq. “Tórteý túgel bolsa, tóbedegi keledi. Altaý ala bolsa, aýyzdaǵy ketedi” degen danalar sózi rastaldy.
Ejelden belgili, tarıh dáleldegen jaılar bar: qashanda, qaı iste bolsyn hany men halqy bir bolyp, tutastyq qurǵanda memleket nyǵaıyp, el yrysy tasady. Al halqy qoldamaı, hany halqyn qorǵamaı, ózimshildik óktemdik alyp, ózara talas-tartysqa túskende memleket álsirep, el yrysy qashady.
Keshegi qandy qyrǵyn, jastaıynan qıylǵan ómirler, ańyraǵan analardyń zary, jetimderdiń kóz jasy kimge paıda ákeldi? Endi janǵa túsken jaraqatty, jaralanǵan júrek pen zerdeni jazý qandaı qıyn deseńizshi.
Qyrǵyz eliniń basyna túsken qasiret Sizdiń qarapaıym da tereń oılaryńyzdy taǵy bir túısikteýge múmkindik berdi. “El týraly jadaǵaı oılaý, halyqtyń taǵdyrymen oınaý – túbi jaqsylyqqa aparmaıdy. Eli muratqa jetpeı, eri muratqa jetýshi me edi? Sondyqtan eldiktiń qamyn eń aldymen oılamaı bolmaıdy”, degen sózderińiz ben atqaryp jatqan isterińiz búgingi Qazaqstan halqynyń beıbit ómiriniń negizin qurap otyr. 130-dan astam ult pen ulystyń basyn qosyp, olardyń ózara tatý-tátti ómir súrýine jaǵdaı jasap, úlkeni men kishisin bóle-jarmaı basqarý – myqty ulttyq dili men álem ulaǵatyn boıyna sińirgen adamnyń ǵana qolynan keletin is.
Sizdiń “Eldik te erlik sııaqty syn saǵatta tanylady”, degen sózińizdi endi túsindik. Búgingi tańdaǵy Qyrǵyzstannyń qaıǵy-qasiretin birdeı bólisip, kórshi eldiń halqyna beıbit ómir ornalastyrýǵa bar kúshińizdi salyp jatqanyńyzǵa myń da bir rahmet. Eńsesi túsken eldiń esin jıǵyzyp, japa shekken, zar jylaǵan halyqtyń kóz jasyn tyıǵyzý eldiktiń eń úlken úlgisi. Azamatynan aırylǵan arǵymaqqa qaıtadan er saldyrý, tutastyq týyn qolǵa qaıtadan aldyrý – erliktiń úlgisi.
Biz búgingi beıbit tirligimiz úshin, Qazaqstan dep atalatyn memlekettiń jer betinde barlyǵy úshin, osy eldi basqaratyn Siz sııaqty Azamat bar ekendigi úshin Allaǵa minájat etemiz.
Qazaqstan qyrǵyzdary atynan: Qazaqstan halqy Assambleıasynyń múshesi, “Qyrǵyzstan-Astana” qoǵamdyq birlestiginiń basshysy Sh.A.ISMAILOV.