Búgin Qyzylorda qalasy ákiminiń orynbasary Asqarbek Esjanov 8 naýryz – halyqaralyq áıelder merekesine oraı ár salada eseli eńbegimen erekshelengen birqatar názik jandardy qabyldap, shahar basshysynyń merekelik quttyqtaýyn jetkizdi.
«Qazaqstan qoǵamynda áıelder, eń aldymen, aıaýly ana, súıikti jar odan keıin kásibı maman jáne jaýapty laýazym ıesi. Sondyqtan da aıtýly mereke qarsańynda abzal analar men aıaýly arýlarǵa laıyqty syı-qurmet kórsetilýi eldigimizdiń belgisi» degen Asqarbek Temirbekuly áıelder qaýymyna merekelik lebizin bildirdi. Sonymen qatar ár salada tabysty eńbek etken ardager analar men búgingi qoǵamda erlermen ıyq tirese qyzmet etip júrgen qyz-kelinshekterdi qala ákiminiń alǵys hatymen marapatady.
«Qyzylorda tazalyǵy» JShS jumysshysy Beıbitkúl Kópjanova merekede analardyń mereıin asyrǵan qala ákimine alǵysyn bildirip, aldaǵy bastamalaryna tabys tiledi.
Merekege oraı marapattalǵandar qatarynda bilim jáne áleýmettik sala mamandary, qalalyq sý, jylý, júıeleri men avtobýs parkiniń jumysshylary, memlekettik qyzmetkerler bar.