Batys Qazaqstan oblysynda 1 naýryzdan beri 457 adamnan koronavırýs anyqtaldy. Bul týraly Batys Qazaqstanda ákimi Ǵalı Esqalıevtiń tóraǵalyq etýimen ótken oblystyq jedel shtabtyń kezekti otyrysynda aıtyldy, dep habarlaıdy Egemen.kz
Oblystyq sanıtarlyq-epıdemııalyq baqylaý departamenti basshysynyń orynbasary Nurlybek Mustaevtyń málim etkenindeı, indet juqtyrǵandardyń 39,6 paıyzy JRVI belgileri boıynsha qaralǵan kezde belgili boldy.
Sondaı-aq 39,4 paıyzy – buryn aýyrǵandarmen qarym-qatynasta bolǵandar. Iаǵnı úı oshaǵynda oqshaýlaný tártibi saqtalmaǵandyqtan, kovıd kemi úsh-tórt adamǵa juǵady. Naýryzda KVI juqtyrǵandarmen baılanysta bolǵan 1075 adam medısınalyq baqylaýǵa alyndy.
Indet juqtyrǵandardyń 37,4 paıyzy – jumys isteıtinder, 21,2 paıyzy – zeınetkerler, 17,3 paıyzy – jumyssyzdar, 10,7 paıyzy – oqýshylar. Oqý jyly bastalǵaly barlyǵy 522, úshinshi toqsanda, 11 qańtardan beri 307 oqýshydan indet shyqty. 23 aqpan men 8 naýryz aralyǵynda 16 mekteptegi 25 synyp karantınge jabyldy.
«Alda Kórisý kúni, sodan keıin Naýryz meıramy kele jatyr. Sondyqtan osy merekeler kezinde eń aldymen saqtyqty umytpaı, is-sharalardy onlaın ótkizý kerek», dedi N.Mustaev.
Osyǵan oraı óńir basshysy Ǵ.Esqalıev monıtorıngtik toptar jumysyn kúsheıtýdi tapsyrdy.