«Cultural Dialogue» qoǵamdyq qory Hanzada Klaýs Qorynyń qoldaýymen (Nıderlandy) «Alma Museum»-men birlesip, álemdik mańyzy bar genetıkalyq qor – sıvers almasynyń jabaıy jemis ormandaryn jańǵyrtýǵa arnalǵan «Almaty+ty» jas kásibı sýretshilerdiń kórmesin ashty, dep habarlaıdy Egemen.kz
Jobanyń maqsaty – shyǵarmashyl jastardyń nazaryn tabıǵı murany saqtaý jáne jańǵyrtýǵa aýdarý. Sıvers almasynyń tarıhy ejelgi dáýirden bastalady. Kórmege kúrdeliligimen jáne kórkemdik tásilderiniń alýan túrliligimen erekshelenetin akvarel tehnıkasynda oryndalǵan qyryqtan astam jumys qoıyldy. Qazaqstan ónerindegi akvarel dástúrlerin Á.Qasteev, O.Tańsyqbaev, A.Ismaılov, Ý.Ájıev sııaqty kórnekti sheberler qalyptastyrdy deıtin bolsa, bul kórkem murany qazirgi avtorlar damytyp keledi.
Bıylǵy jyly COVID-19 vırýsynyń pandemııasy sýretshilerge de, álemdik mádenıetke de keri áserin tıgizdi. «Cultural Dialogue» QQ dırektory Janna Mambetova atap ótkendeı, kórmeniń maqsaty jas kásibı sýretshilerdi qoldaý. Osy oraıda on sýretshiniń jumysy Qazaq jemis-kókónis sharýashylyǵy ǴZI ǵımaratynda turaqty ekspozısııa úshin tańdap alynǵan ári qalamaqy tólengen.
Qazaq jemis-kókónis sharýashylyǵy ǴZI keńesiniń tóraǵasy Serik Sadyqovtyń aıtýynsha, Qazaqstan alma men qyzǵaldaqtyń otany. Shyǵarmashylyq kórme alma daqyldarynyń gendik qoryn saqtaý, jergilikti alma aǵashyn qalyń buqara arasynda jańǵyrtýdy dáripteýge negizdeledi.
«Almaly jumaq» QQ basshysy Ajar Djandosova «Sıvers almasyn Qazaqstannyń tabıǵı murasy retinde saqtaý taqyrybyn ilgeriletýge jáne Almatyny almanyń otany retinde tanymal etýge, atap aıtqanda, «Almaty + ty» sımvolıkalyq ataýymen shyǵarmashylyq jobalar arqyly barlyq múddeli qatysýshylardyń kúsh-jigerin biriktirýge umtylamyz», dep atap ótti. Kórme kýratory – ónertanýshy Vıoletta Vologodskaıa «Almaty» qonaq úıinde ornalasqan kórme naýryz aıynyń sońyna deıin jalǵasatyndyǵyn aıtty.