Qurlyqtyq hokkeı lıgasynyń (QHL) Gagarın kýbogy jolyndaǵy jarystyń pleı-off kezeńinde synǵa túsip jatqan elordanyń «Barysy» men Magnıtogorskiniń «Metallýrgi» muzaıdyndaǵy tórtinshi kezdesýin ótkizgen bolatyn. Nur-Sultandaǵy «Barys-Arenada» ótken básekede jerlesterimiz jeńiske jetip, serııadaǵy jalpy esepti teńestirdi – 2:2.
Elordada ótetin alǵashqy match qarsańynda Úkimet janyndaǵy vedomstvoaralyq komıssııa (VAK) Qazaqstan aýmaǵynda koronavırýstyń taralýyna jol bermeý boıynsha birqatar qosymsha qorǵaný sharalaryn jeńildetip, sporttyq oıyndardy stadıondy kórermen sanyn 30 paıyzdan aspaıtyn kólemde toltyra otyryp ótkizýge ruqsat etti. Sóıtip pandemııaǵa baılanysty bir jylǵa jýyq jankúıerlersiz oınaǵan «Barys» alǵash ret pleı-off kezeńinde kórermenderiniń qoldaýymen óner kórsetti.
6 naýryzda ótken eki komanda arasyndaǵy úshinshi kezdesýde jerlesterimiz jeńip turǵan oıynda qarsylastaryna jol berip qoıdy. Nur-Sultanda ótken básekeni «Barys» jap-jaqsy bastaǵan edi. 15-mınýtta Lınýs Vıdellden tamasha pas alǵan Iаkob Lılıa esep ashyp, aıdyn ıelerin alǵa shyǵardy. Úzilisten keıin jaǵdaı kúrt ózgerdi. 24-mınýtta Nıkolaı Goldobın tarazy basyn teńestirse, arada úsh mınýt ótken soń Egor Martynov ekinshi shaıbany qaqpaǵa engizdi – 1:2. Al úshinshi kezeńde «Barys» oıynshylary esepti teńestirýge qansha umtylǵandarymen, match sońyna deıin tablodaǵy esep ózgergen joq.
Araǵa eki kún salyp eki komanda oıynshylary «Barys-Arenada» tórtinshi oıynyn ótkizdi. Elordalyq komanda kezdesýdi qarqyndy bastaǵanymen, esepti qonaqtar ashty. Pavel Akolzın tártip buzyp, muzaıdynnan qýylǵan soń san basymdyǵyna ıe bolǵan «Metallýrg» Nıkolaı Prohorkın golynyń arqasynda esepte alǵa shyqty. Keıinnen «Barys» oıynshylarynda da gol soǵyp, tablodaǵy kórsetkishti teńestiretin birneshe múmkindik bolǵanymen, shabýyldy nátıjeli túıindeı almady. Abyroı bolǵanda birinshi kezeńniń aıaqtalýyna bir sekýnd qalǵanda san basymdyǵyna ıe bolǵan jerlesterimiz gol soǵyp, úziliske teń nátıjemen attandy. Gol avtory – Mettıý Frettın. Ekinshi kezeńde de komandalar bir-bir shaıbamen almasty. 25-mınýtta qonaqtardyń shabýylshysy Nıkolaı Goldobın mergendigimen kózge túsip, esepti 2:1-ge jetkizse, arada eki mınýt ótkende qorǵaýshy Djessı Bleker pleı-off kezeńindegi alǵashqy shaıbasyn soqty.
Úshinshi kezeń tolyq «Barystyń» basymdyǵymen ótti. 52-mınýtta taǵy da san basymdyǵyna ıe bolǵan jerlesterimiz «Metallýrg» qaqpashysy Iýho Olkınýorany qapy qaldyrdy. Kıortıs Volk pen Nıkıta Mıhaılısten pas alǵan Roman Starchenko óz atyn tabloǵa jazdyrtty. Al oıynnyń sońǵy mınýtynda qonaqtardyń bas bapkeri esepti teńestirý úshin qaqpashynyń ornyna alańǵa altynshy oıynshy shyǵardy. Alty hokkeıshimen match sońynda ústemdik qurmaq bolǵan qonaqtardyń maqsaty júzege aspady. 59-mınýtta qaqpashy Ionı Ortıonyń pasynan keıin Kırıll Panıýkov qonaqtardyń bos qalǵan qaqpasyn dál kózdep, matchtyń núktesin qoıdy. Qorytyndy esep – 4:2. Panıýkovtyń munyń aldynda da bos turǵan qaqpaǵa gol soǵatyn tamasha múmkindigi bolǵan. Alaıda alystan jasaǵan soqqysy qaqpadan sál qıys ketti.
Matchtan keıin pikir bildirgen Kırıll Panıýkov mansabynda tuńǵysh ret bos qaqpaǵa gol soqqanyn aıtty. Onyń pikirinshe bos qalǵan qaqpaǵa gol soǵý oıyn sátindegi golǵa qaraǵanda qıyn kórinedi.
Eki ujym arasyndaǵy besinshi kezdesý keshe keshkisin Magnıtogorsk qalasynda ótti. Onda qandaı nátıje tirkeletinine qaramastan, altynshy match 12 naýryzda elordadaǵy «Barys-Arenada» uıymdastyrylatyn bolady.