Nur-Sultan qalasynyń ákimi Altaı Kólginov bıyl elordada 16 mektep salynatynyn aıtty. Bul týraly ol óziniń Instagram paraqshasynda jazdy, dep habarlaıdy Egemen.kz.
«Tańerteńgilik qalany aralaý barysynda birqatar mekteptiń qurylysymen tanystym. Mysaly, Esil aýdanynda ornalasqan mektep (Uly Dala dańǵyly men №39 kósheniń qıylysy) eki aýysymda 2400 oqýshy ornyn qurýǵa múmkindik beredi. Sonshama oryn Almaty aýdanyndaǵy mektepte qurylady», dep jazdy A. Kólginov.
Osy oraıda ol tehnıka men adamdardy jumyldyrýdy tapsyrdy. Oqý oryndaryn barlyq qajetti jabdyqtarmen qamtyp, mektepterge kirme joldardy oılastyrý, sondaı-aq mektep aýmaǵyn abattandyrý men kógaldandyrýǵa erekshe nazar aýdarý qajettigin atap ótti.
«Ekinshi mektep boıynsha da ınjenerlik jelilerge qosylý máselesin sheshýdi tapsyrdym. Bıyl barlyǵy 16 mektep salýdy josparlap otyrmyz. Oqý oryndaryn salý kezinde iri mektepterge kóshemiz. Osy sharalardyń arqasynda bıyl ǵana 40 myńnan astam oqýshy orny qurylady. Demek, 2020 jylmen salystyrǵanda oqýshy oryndarynyń sany 2 eseden astam, al 2019 jylǵa qaraǵanda 4 ese ulǵaıady. Mysaly, ótken jyly 11 mektep salyndy», delingen jazbada.
Onyń aıtýynsha, mektepterdiń kóbeıýi úsh aýysymmen oqytatyn mektepter sanyn 8-den 4-ke deıin, al tyǵyzdalǵan rejımi bar mektepter sanyn 22-den 14-ke deıin qysqartýǵa múmkindik berdi.
«Sonymen qatar, birqatar mektepter jylytý qazandyǵynan ortalyqqa aýystyryldy. Bul jyl saıyn 100 mln teńgege deıin qarajat únemdeýge múmkindik beredi. Mektep qurylysyna da jeke ınvestısııa tartamyz. Investısııalyq keńesterde 30-dan astam jeke menshik mekteptiń qurylysy qoldandy. Sonymen qatar, keshendi jospar aıasynda 5 jyldyq kezeńge 50-ge jýyq memlekettik mektep salý josparlanǵan. Sondaı – aq, qoldanystaǵy oqý oryndaryna tıisti nazar aýdarý qajet-ótken jyly 26 bilim berý nysany jóndeldi. Osy jyly da jumystar júıeli deńgeıde jalǵasa bermek», dep jazdy ákim.