QR Parlamenti Májilisiniń burynǵy depýtaty Zaǵıpa Balıeva Almaty qalasyndaǵy Qazaq ulttyq agrarlyq zertteý ınstıtýtynyń prorektory qyzmetine taǵaıyndaldy.
«Rektorlar keńesiniń otyrysy boldy. Jıyn barysynda men ýnıversıtettiń strategııalyq damý jáne ınfraqurylym, sıfrlandyrý jónindegi prorektory bolyp taǵaıyndaldym. Jumysqa búgin kiristim», - dedi Z.Balıeva. Onyń aıtýynsha, ýnıversıtette zerthana kóp.
«Munda ǵalymdar COVID-19 vaksınasyn jasap jatyr. Professorlyq oqytýshylyq quram óte myqty», dedi eks-depýtat.
Aıta keteıik, Zaǵıpa Balıeva 1958 jyly Almaty oblysy Kegen aýdany Jalańash aýylynda týǵan. Kırov atyndaǵy memlekettik ýnıversıtetti zańger-quqyqtanýshy mamandyǵy boıynsha bitirgen.
Ár jyldary Ortalyq saılaý komıssııasynyń tóraıymy, Qazaqstannyń ádilet mınıstri, QR parlament májilisiniń depýtaty, Qazaqstandaǵy bala quqyqtary jónindegi ýákil qyzmetin atqarǵan. Ol «Qurmet», «Parasat», «Kúmis alqa», «Qazaqstan Respýblıkasynyń táýelsizdigine 10 jyl», «Qazaqstan Respýblıkasynyń táýelsizdigine 20 jyl», «Qazaqstan Konstıtýsııasyna 10 jyl» ordenderimen marapattalǵan.