Memleket basshysy Qasym-Jomart Toqaev Twitter paraqshasynda osydan bir jyl buryn bastalǵan koronavırýs pandemııasyna qatysty pikir bildirdi, dep habarlaıdy Egemen.kz.
«Bir jyl buryn DDSU pandemııanyń bastalǵanyn jarııalady. Sodan beri Qazaqstan búkil álemmen birge kóptegen qıyndyqty bastan ótkerdi. Memleket azamattardyń ómiri men densaýlyǵyn qorǵaý úshin pármendi sharalar qabyldady. Tótenshe jaǵdaı kezinde tabyssyz qalǵan turǵyndarǵa qarjylaı jáne basqa da kómek berildi. Biz bereke-birlik pen ózara qoldaýdyń arqasynda órshigen indetti eńserdik», dep jazdy Prezıdent.
Osy oraıda Memleket basshysy derttiń qateri áli de seıilmegenin aıtty.
«Vırýsty vaksınasııa arqyly ǵana túbegeıli aýyzdyqtaı alamyz. Barsha otandastarymyzdy aýyryp em izdegenshe, aýyrmaıtyn jol izdeýge shaqyramyn», delingen jazbada.