Almatydaǵy «Shymbulaq» taý-shańǵy kýrortynda uıymdastyrylǵan frıstaıl-mogýl jáne frıstaıl-akrobatıkadan álem chempıonatynyń sońǵy jarys kúninde sportshylar komandalyq shańǵy akrobatıkasynan júldelerdi sarapqa saldy.
Ujymdyq saıysta Qazaqstan quramasynyń sportshylary óz jankúıerlerin qýanta almady. Úsh sekirýdiń qorytyndysy boıynsha bizdiń sportshylar 211.62 upaı jınap, jeti quramanyń ishindegi sońǵy jetinshi orynda qalyp qoıdy. Sóıtip bizdiń jigitter fınaldan tys qaldy. Al negizgi fınalǵa úzdik nátıje kórsetken tórt qurama shyqty. Bas júlde úshin ótken básekede upaıdan shashaý shyǵarmaǵan reseılik sportshylar top jardy. Ekinshi oryn Shveısarııa sportshylaryna, úshinshi oryn AQSh quramasyna buıyrdy.
Shańǵy akrobatıkasynan álem chempıonatynyń jekeleı syndaǵy alǵashqy kúninde jarys jolyna shyqqan Qazaqstan quramasynyń sportshylary Janbota Aldabergenova men Aqmarjan Qalmurzaeva tańǵy baǵdarlamadaǵy irikteý kezeńinde sátti óner kórsetip, birinshi fınalǵa joldama alǵan bolatyn. Alaıda túski sessııadaǵy kishi fınalda Janbotaǵa da, Aqmarjanǵa da sáttilik joldas bolmady. Talaı dúbirli dodalarda daralanyp, el qorjynyna júlde salyp júrgen tájirıbeli sportshylar elimizde ótken álem chempıonatynda bilgenderinen jańylyp, bolmashy qateliktiń saldarynan negizgi fınalǵa joldama ala almady. Kishi fınalda J.Aldabergenova 81.36 upaı jınap, segizinshi oryn alsa, A.Qalmurzaeva 80.91 upaımen toǵyzynshy satyǵa turaqtady.
Bul synda 2015 jyly Aýstrııanyń Kraıshberg qalasynda uıymdastyrylǵan álem chempıonatynda úzdik shyqqan aýstralııalyq Lora Pıl top jardy. Ekinshi oryndy Vankýver (2010) jáne Sochı Olımpıadalarynyń (2014) jeńimpazy Eshlı Koldýell (AQSh) ıelense, úzdik úshtikti 2019 jylǵy álem chempıonatynyń kúmis júldegeri reseılik Lıýbov Nıkıtına túıindedi.
О́kinishke qaraı, Qazaqstan erler komandasy alǵashqy irikteý kezeńinen árige asa alǵan joq. El qorjynyna júlde salady dep úmittengen Sherzod Hashırbaevtyń ózi irikteýdi 18-orynmen túıindedi. Esterińizde bolsa, Sherzod jýyrda ǵana AQSh-taǵy North American Cup týrnırinde altyn júlde ıelengen edi. Sondaı-aq erler quramasynan synǵa túsken Nurlan Batyrbaev álemdik dodany 25-shi, Roman Ivanov 27-shi orynmen aıaqtady.
Erler jarysynda álem chempıonatynyń eki dúrkin jeńimpazy reseılik Maksım Býrovqa teń keler qarsylas tabylmady. Almatydaǵy jarysta eń kóp upaı jınaǵan ol tuǵyrdyń bıik satysyna jaıǵasty. Keıingi oryndardy amerıkalyq Krıstofer Lıllıs jáne taǵy bir reseılik sportshy Pavel Krotov ıelendi.
Almatydaǵy álem chempıonaty máresine jetken soń odaqtas memleketterdiń Ulttyq shańǵy qaýymdastyqtary basshylary men ókilderiniń konferensııasy ótti. Jıynǵa qatysqan Qazaqstan Ulttyq Olımpıadalyq komıtetiniń bas hatshysy Andreı Krıýkov álem chempıonatyn uıymdastyrý elimizdiń halyqaralyq arenadaǵy ımıdjin jaqsartyp qana qoımaı, bizdiń sportshylarymyzǵa tórelik jasaýda jáne Olımpııa oıyndarynyń aldyndaǵy reıtıngti túzýde erekshe áseri bolǵanyn atap ótti. Odan bólek, álem chempıonatyn ótkizý arqyly atalǵan sport túriniń elimizde qarqyndy damýyna jol ashylyp, tóreshiler men bapkerler quramynyń biliktiligin arttyrýǵa kóńil bólinetinin aıtty.
«Buǵan deıin elimizde ótken Álem kýbogynyń kezeńderi Qazaqstandaǵy frıstaıldyń damýyna aıtarlyqtaı serpin berdi. Mogýl da, shańǵy akrobatıkasy da qarqyndy túrde damyp jatyr. Ulttyq quramaǵa byltyr ǵana qosylǵan 15 jastaǵy Anastasııa Gorodkonyń qola júldesi mundaı básekelerdi elimizde ótkizýdiń mańyzdy ekenin dáleldeıdi. Byltyr kóptegen jarys ótkizilmeı, birazy keıinge shegerildi. Sondyqtan bul jarystyń orny erekshe», dedi Qazaqstan Ulttyq Olımpıadalyq komıtetiniń bas hatshysy.
Aıta keteıik, Almatyda frıstaıldan álem chempıonatynda qazaqstandyq sportshylar mogýl boıynsha úsh medal jeńip aldy. Iýlııa Galysheva kúmis júldeger atansa, Pavel Kolmakov qolaǵa qol sozdy. Al 15 jastaǵy Anastasııa Gorodko paralleldi mogýl boıynsha úzdik úshtikke endi.