Kún raıyna da, kórshige de alań...

Búginde oblys aýmaǵyndaǵy barlyq ózen-kól qatyp jatyr. Degenmen, kóp jyldyq monıtorıngke qarasaq, 36 myńnan astam halyq turatyn 85 eldi meken sý tasqyny qaýpine ushyraýy múm­kin. Eń qaýipti aýmaq – Oral qalasy, Tasqala, Qaztalov jáne Báıterek aýdandary.

– Biz óńirdegi tasqyn yqtı­maldyǵyn úsh deńgeıge bólemiz. Máselen, oblysta sý basý qaýpi jo­ǵary 27 eldi meken bar. 50 eldi meken – sý basý qaýiptiligi ortasha deńgeıge, taǵy 8 eldi meken qa­ýiptiliktiń tómen deńgeıine ja­tady, – deıdi Jasulan Ju­mashev.

Oblys turǵyndaryna eń úlken qaýip transshekaralyq ózenderden keledi. Bul bastaýy­n Reseıden alatyn ózenderdiń mol sýyna ǵana emes, kórshi el aýmaǵynda ornalasqan sý qoı­malarynan jiberiletin sý kó­lemine de baılanysty. О́ıtkeni óz­derine qaýip tóngende mol sýdy tómenge qaraı jibere salý  órdegi kórshilerimizdiń baıyr­ǵy ádeti.

Batys Qazaqstan oblystyq Tótenshe jaǵdaılar departamenti bas­shylyǵy reseılik áriptes­terimen, atap aıtqanda, Saratov jáne Orynbor oblystarymen sý tasqyny jaǵdaıy boıynsha jıi habar almasyp otyratynyn, sonyń ishinde Irıklın jáne Varfolomeev sý qoımalaryn qaýipsiz jáne ózara tıimdi paıdalaný máseleleri boıynsha ózara boljamdyq jáne jedel aqparat almasý turaqty negizde júrgiziletinin aıtady.

«Qazgıdromet» fılıalynyń málimetine qaraǵanda, oblys aýma­ǵynda bıylǵy jaýyn-shashynnyń mólsheri qalypty. Qardyń eń qalyń qabaty 31 sm bolsa, topyraqtaǵy toń 35-69 sm-ge jetedi. Shyńǵyrlaý, Shejin-2, О́leńti jáne Shiderti ózenderiniń basseınderinde ylǵal qorynyń kólemi qalypty deńgeıde bolsa, Derkól men Sha­ǵan ózenderi buǵan deıingi kóp jyldyq kórsetkishterden 13-16%-ǵa tómen eken. Árıne saqtyqta qorlyq joq. Qar kúrt erip, jańbyr mol jaýatyn bolsa, eldi meken turǵyndaryna qaýip tónýi múmkin. Sondyqtan óńirde sý tasqyny kezeńindegi tótenshe jaǵdaılardyń aldyn alý maq­satynda keshendi is-sharalar júr­gizilýde. Yqtımal tótenshe jaǵdaılardyń aldyn alý jos­pary bekitilip, oblystyq, qalalyq jáne aýdandyq sý tasqynyna qarsy komıssııalar men shtabtar qurylǵan.

Jergilikti bılik oryndary eldi mekender ishindegi qar­dy, aýlalardy tazartý isin qys bastalǵaly nazarǵa alyp keledi. Sonyń ishinde qala kósheleri men óndiristik nysandar aýma­ǵynan qar shyǵarý jumysyn uıymdastyrýy, erigen sýdyń erkin aǵýy úshin aryqtardyń tazalanýy, jazataıym oqıǵalardyń aldyn alý úshin shatyrdy qardan jáne súńgiden tazartý jumysy júrgizilýi qajet. Bul talaptar­dy oryndamaǵan tulǵalarǵa zań­dy shara da qoldanylady.

– Ákimshilik kodekske sáıkes aýmaqty abattandyrý ere­je­lerin buzǵany, onyń ishinde qardy ýaqtyly jınamaǵany úshin 22 tulǵa ákimshilik jaýap­kershilikke tartyldy, – deıdi oblystyq Tótenshe jaǵdaılar departamentiniń bastyǵy.

Sońǵy málimetterge qara­ǵanda, oblys aýmaǵyndaǵy eldi me­kenderden 593 480 tekshe metr qar shyǵarylyp, 1150-den astam tekshe metr erigen sý sorylǵan. Eń kóp jumys, árıne Oral qalasynda atqarylýda. Oblys ortalyǵynda kúni búgin 537 233 tekshe metr qar qala aýmaǵynan aýlaqqa shyǵarylǵan. Sonyń 3866 sharshy metri – sońǵy táýliktiń jumysy. Kóktemde bo­lýy yqtımal tótenshe jaǵ­daılardyń aldyn alý jáne joıý úshin jalpy sany 2591 adam, 734 tehnıka, 45 júzý quraly jáne 295 motosorǵy daıyndalǵan.

– Naýryz aıynyń 4-5-i kúnderi «Kóktem-2021» atty res­pýblıkalyq komandalyq-shtab­tyq oqý-jattyǵýy ótti. Is-shara barysynda kúshter men quraldardyń daıyndyǵy tek­serildi. Batys Qazaqstan oblysy kóktemgi sý tasqyny maýsymyna saqadaı saı, – dep habarlady oblystyq Tótenshe jaǵdaılar departamentiniń baspasóz hatshysy Bákızat Maǵzenova.

Jalpy, osy kóktemde bolýy yqtımal túrli sıpattaǵy tótenshe jaǵdaılardy joıý úshin oblys boıynsha 1,5 mlrd teńge qarastyrylǵan kórinedi. Búgingi tańda 443 tonna janar-jaǵarmaı, 88 myń dana qap, 22 myń tonna ınertti materıaldar qory daıyndalǵan. Muzjarǵyshtar brıgadalary úshin – 6,820 mln teńge, tikushaq kómegimen aerozertteý júrgizý úshin – 16,7 mln teńge, qosymsha qaptar sa­typ alý úshin – 2,895 mln teńge kóleminde sharttar jasaý maqsatyna qarajat kózdelgen.

О́tken jyldardyń tájirı­besi kórsetkendeı, Batys Qazaq­standaǵy sý tasqynynyń deńgeıi oblystaǵy jaǵdaıǵa ǵana emes, Reseı aýmaǵyndaǵy aýa raıyna da baılanysty bolady. Sondaı-aq bir táýlik ishinde jaýyn-shashynnyń aılyq normasy túsýi múmkin, bul sý tasqyny jaǵ­daıynyń týyndaýyna soq­tyrady. Sondyqtan tótenshe jaǵdaılar qyzmeti «saqtansań –  saqtaımyn» degen qanatty sózdi basshylyqqa alyp, kez kelgen oqıǵaǵa daıyn turýǵa tyrysady.

Batys Qazaqstan oblysy