Nur-Sultan qalasynyń qyzyl aımaqqa engenin eskere otyryp, jeksenbi kúni, ıaǵnı 21 naýryzda elordaǵa lokdaýn engiziledi, dep habarlaıdy Egemen.kz elorda ákiminiń baspasóz qyzmetine silteme jasap.
Jeksenbide SOO, SÚ, SO (olarda ornalasqan dárihanalardy, sondaı-aq tamaq ónimderi men birinshi kezekte qajetti zattardy satatyn jáne ornalasqan jerine qaramastan qyzmetine ruqsat etilgen obektilerdi qospaǵanda), jabyq azyq-túlik emes bazarlar, azyq-túlik emes taýarlardy ótkizetin obektiler, jabyq sport obektileri, HQO, «Qazposhta» AQ sekildi mekemelerdiń jumys isteýine tyıym salynady.
Sondaı-aq dezınfeksııalyq jumystar júrgizilýine baılanysty jeksenbi kúni qoǵamdyq kóliktiń jumysy toqtatylady.
Senbi jáne jeksenbi kúnderi fıtnes-ortalyqtardyń, fıtnes-klýbtardyń, sporttyq-saýyqtyrý obektileriniń, saýnalardyń, SPA-ortalyqtardyń («sary aımaq» krıterııleri qoldanylatyn «Ashyq» pılottyq jobasyna qatysatyn obektilerdi qospaǵanda) jumysyna tyıym salynady.
«Qaladaǵy epıdemıologııalyq jaǵdaı turaqsyz. О́tken mereke kúnderinen keıin koronavırýs ınfeksııasyn juqtyrýshylar sany kúrt kóbeıdi. Osyǵan baılanysty qosymsha karantındik shekteýleri bar qaýly 18 naýryzdan bastap qoldanysqa engiziledi.
Naýryz meıramyna oraı buqaralyq is-sharalar ótkizýge tyıym salynady. Indettiń órshýine jol bermeý kerek. Medısınalyq uıymdar men medısına qyzmetkerlerine shamadan tys júkteme bolmas úshin qatań sanıtarlyq normalar saqtalýy qajet, ıaǵnı betperde taǵyp, áleýmettik qashyqtyqty saqtaý kerek», - dedi Nur-Sultan qalasynyń bas memlekettik sanıtarlyq dárigeri Sarhat Beısenova.
S. Beısenova 18 naýryzdan bastap qoǵamdyq tamaqtaný obektileriniń (meıramhanalar, dámhanalar, barlar, ashanalar) jumys jáne demalys kúnderi saǵat 07:00-den 22:00-ge deıin jumys ýaqyty qysqaratynyn atap ótti.
Sonymen qatar, 18 naýryzdan bastap kınoteatrlar men kınorýmdardyń jumysyna tyıym salynady.