Qurlyqtyq hokkeı lıgasynda (QHL) baq synaǵan Qazaqstannyń «Barys» klýby úshin bıylǵy maýsym Gagarın kýbogy jolyndaǵy jarystyń birinshi pleı-off kezeńimen aıaqtaldy. Atalǵan dodada elordalyq ujym Magnıtogorskiniń «Metallýrgimen» muzaıdynda jolyǵyp, alty matchqa sozylǵan básekede 4:2 nátıjesimen jeńilip qaldy.
«Barys» hokkeıshileriniń óz jankúıerlerin budan da joǵary nátıjemen qýantýǵa tolyq múmkindikteri bar edi. Alaıda sońǵy básekelerde jerlesterimizge shydamdylyq pen sportshyǵa tán jigerli minezdiń jetispeı qalǵanyn baıqadyq. Sebebi keı oıyndarda esepte alda turǵanymen, match sońynda qolda turǵan jeńisti ýystarynda ustaı almady. Áıtpese, osydan dál bir jyl buryn bizdiń jigitter pleı-off kezeńinde «Metallýrg» komandasymen jolyǵyp, bes kezdesýde 4:1 nátıjesimen aılasyn asyryp ketken bolatyn. Deı turǵanmen elordalyq komanda bıyl óz aldyna qoıǵan maqsatty 100 paıyz oryndady deýge bolady. О́ıtkeni maýsym aldynda «Barystyń» bas menedjeri Vıacheslav Belan AllHockey.ru basylymyna bergen suhbatynda «Klýbtyń basty maqsaty – Gagarın kýbogynyń pleı-off kezeńine deıin jetý», degen bolatyn.
Árıne, byltyrǵy nátıjeni jaqsarta almasa da, alǵa qoıǵan mejege jetip jyǵylǵanynyń ózi jetistik. Onyń ústine «Barys» álemdik pandemııaǵa baılanysty jańa maýsymǵa jarytyp daıyndala alǵan da joq. Tipti, jaz mezgilinde bıylǵy dodaǵa qatysý-qatyspaýynyń ózi úlken másele boldy. Eldegi epıdemııalyq ahýal hokkeıshilerge turaqty birinshilik aldynda oqý-jattyǵý jıynyn ótkizýge múmkindik bergen joq. Tek maýsymǵa bir aı qalǵan kezde ǵana, ıaǵnı tamyz aıynda tolyqqandy jattyǵýǵa kiristi. Sonymen qatar «Barys» jylda turaqty birinshilik aldynda shaıbaly hokkeıden dástúrli Prezıdent kýbogy jarysyna qatysyp, daıyndyǵyn bir pysyqtap alatyn. Taǵy sol koronavırýsqa baılanysty bul jarys byltyr múlde uıymdastyrylmady.
Pandemııaǵa baılanysty klýbtyń bıylǵy qarjylyq jaǵdaıy da ótken jylmen salystyrǵanda asa máz bolǵan joq. Nátıjesinde ótken maýsymda «Barysty» órge súıregen oıynshylardyń bir shoǵyry, atap aıtqanda bas bapker Andreı Skabelka, qaqpashy Eddı Paskýale, tasqamal qorǵaýshy Atte Ohtamaa, «Barystyń» eń úzdik shabýylshysy atanǵan Korben Naıt pen taǵy bir tájirıbeli shabýylshy Iıro Pakarınen komandadan ketti. Bálkim, atalǵan hokkeıshiler bıyl da elorda klýbynda óner kórsetkende «Barys» biraz jerge jeter me edi, kim bilsin?! Onyń ústine komandany jattyqtyrý QHL-da tájirıbesi joq Iýrıı Mıhaılıske senip tapsyrylǵanyn da utymdy sheshim deı almasaq kerek. Árıne, bul jerde komanda basshylyǵynyń kórpesine qaraı kósilgeni anyq.
Sóıtip maýsymaralyq úziliste «Barys» tizginin ustaǵan 51 jastaǵy otandasymyz Iýrıı Mıhaılıs jazǵy transferde joǵarydaǵy oıynshylardyń ornyn basady degen úmitpen shetten birneshe hokkeıshi aldyrtty. Máselen, jazda komandaǵa fınlıandııalyq qaqpashy Ionı Ortıo, shvesııalyq shabýylshy Iаkob Lılıa, kanadalyq shabýylshy Mett Frettın men qorǵaýshy Dıllon Heterıngton qosylsa, maýsym ortasynda «Barys» quramyn fınlıandııalyq qorǵaýshy Aleks Lıntýnıemı jáne kanadalyq shabýylshy Fılıp Varone tolyqtyrdy. Bul oıynshylardyń komandaǵa qanshalyqty kómegi tıgenine baǵany jankúıerler bere jatar.
Maýsym aldyndaǵy bir suhbatynda Iýrıı Mıhaılıs bıyl jastarǵa senim artatynyn aıtqan bolatyn. Biraq bas bapker «Barystyń» qosalqy quramy sanalatyn «Nomad» jáne jastar oınaıtyn «Snejnye Barsy» quramynda óner kórsetken qorǵaýshy Samat Danııar men Tamırlan Gaıtamırov, shabýylshylardan Zahar Parhomenko men Maksım Mýsorovqa «Barystyń» sapynda sheberlikterin shyńdaýǵa tolyqqandy múmkindik bergen joq. Bul hokkeıshiler bolashaq Qazaqstan quramasynyń oıynshylary ekenin esten shyǵarmaǵan jón edi.
«Barystyń» osy maýsymdaǵy statıstıkasyna az-kem kóz júgirtsek. Turaqty birinshilikte 60 oıyn ótkizgen «Barys» onyń 31-inde jeńis toıyn toılasa, 29 kezdesýde jeńilistiń kermek dámin tatýǵa májbúr boldy. 69 upaımen «Shyǵys» konferensııasyndaǵy týrnır kestesinde 6-oryn alǵan jerlesterimiz Gagarın kýbogy jolyndaǵy pleı-off kezeńine shyqty. Qazaqstan komandasy osy aralyqta qarsylastarynyń qaqpasyna 147 shaıba soǵyp, óz qaqpasyna 157 shaıba ótkizip alǵan. Árıne, salystyrmaly túrde alyp qaraıtyn bolsaq, bul jaqsy nátıje emes. Shaıba soǵý kórsetkishi boıynsha ortasha eseppen ár oıynǵa 2,5 shaıbadan ǵana keledi.
«Barysta» jyl saıyn ózgeris bolyp jatsa da tek 27 jastaǵy qorǵaýshy Darren Dıstiń nátıjesi ǵana ózgermeıdi. Bir sózben aıtqanda, Dıs – «Barystyń» kórinbeıtin kóshbasshysy. Qazaqstan azamattyǵyn alǵan kanadalyq hokkeıshiniń kórsetkishi shabýyldaǵy áriptesterinen de joǵary tur. Tipti kóptegen shabýylshy Dıs sekildi kórsetkishimen maqtana almaıdy. Ol 53 oıynda qarsylastar qaqpasyna 17 shaıba soǵyp, 20 ret áriptesteriniń kózge túsýine jaǵdaı jasaǵan. Paıdalylyq koeffısıenti jaǵynan Dıs – tek «Barystaǵy» ǵana emes, lıgadaǵy úzdikterdiń biri.
Sonymen qatar «Barysta» ár jyldary úzdik úshtik jasaqtalatyn. Máselen, 2008-2010 jyldary Konstantın Glazachev, Iozef Shtýmpel, Maksım Sprıdonovtyń oıynyna jankúıerler qol soǵatyn. Osy úsheýiniń arqasynda «Barys» alǵash ret Qurlyqtyq hokkeı lıgasynyń pleı-off kezeńine shyqty. 2011 jyldan 2017 jylǵa deıin Brendon Bochenskı, Dastın Boıd, Naıdjel Doýs «Barysty» alǵa súıredi. Bular da kópshiliktiń súıispenshiligine bólendi. Bochenskıdiń bir ózi tarıh. Mysaly, 2011/2012 jylǵy maýsymda upaı jınaý jaǵynan jeke rekordyn jańartty. Keıinnen óz rekordynan 2015/2016 jylǵy maýsymda (61 upaı) asyp tústi.
Byltyr Korben Naıt (20+21), Roman Starchenko (18+17) jáne Nıkıta Mıhaılıs (17+15) úshtigi oınady. Al osy maýsymda alǵy sheptegi Lınýs Vıdell (9+27), Iаkob Lılıa (20+15) jáne Nıkıta Mıhaılıs (19+15) úshtigi jankúıerler kóńilinen shyqty.