Syrdarııa ózeninde muz jarý jumystaryn júrgizý úshin arnaıy mekememen 10 mln teńgege kelisim shart jasaldy. Bul týraly óńirlik kommýnıkasııalar qyzmetinde ótken brıfıngte oblystyq jumyldyrý daıyndyǵy basqarmasynyń tótenshe jaǵdaılardyń aldyn alý jáne joıý bóliminiń basshysy Aǵaısha Smatova málimdedi.
«Búginde oblys boıynsha Syrdarııa ózeniniń boıynda 56 qaýipti ýchaske bar. Ol jerlerge quramynda 402 arnaıy tehnıka, 1178 adam qamtylǵan 130 mekeme bekitildi. Kún saıyn qala men aýdan boıynsha monıtorıng jumystaryn júrgizip otyrmyz. Sý tasqyny bola qalǵan jaǵdaıda aldyn alýǵa qajetti zattar qory daıyn», dedi A.Qojantaıqyzy.
Qazir Shardara sý qoımasynan Syrdarııa ózenine túsip jatqan sý kólemi azaıyp, nebári 100 tekshe metrdi qurap otyr. Al ózendegi muz qalyńdyǵy ortasha 5-15 sm. soltústik aýdandarda 20-55 sm.
«Qazsýshar» RMK oblystyq fılıaly dırektorynyń orynbasary Jorabek Ernazarov qazir muz Syrdarııa aýdany Kerkelmes ýchaskesinen tómengi aýmaqta turǵanyn aıtady. Kún qabaǵy salqyn bolǵandyqtan muzdyń jyljýy tejelip tur. Qala tóńiregine naýryz aıynyń 20-25 aralyǵynda keledi dep boljanyp otyr.
Oblystyq TJD mamandary darııa boıyndaǵy qaýipti ýchaskelerge tikushaqpen jáne avtokóliktermen baqylaý júrgizip otyr. Saqtyq sharalaryna quramynda 361 tehnıka, 75 motopompa bar azamattyq qorǵaý qyzmetteriniń kúshteri men quraldary daıyn tur. Budan bólek, ózen boıynda ornalasqan sharýa qojalyqtary men turǵyndarǵa qaýipsizdik sharalary týraly túsindirý jumystaryn únemi júrgizilip keledi.