Aýylda ósken aǵa býyn urpaqtyń qulaǵyna «Qoı qozdap, qorada shý...» dep keletin taqyryp ábden tanys bolsa kerek. Ásirese, kóktemgi mal tóldetý maýsymynda bul sózdiń máni erekshe bolmaq. О́ıtkeni tórt túliktiń tóli kóbeıip, mal basynyń artýy qut pen berekeniń bastaýy ǵana emes, tolaıym tabystyń da nyshany. Endi osy údeden shyǵý jolynda bilek sybanyp, bel sheship eńbek etip júrgen shopan qaýymynyń ár kúni táýekelge toly. Bul qatarda jetisýlyq malsaq jandar da bar.
Bıyl Jetisýda saqman ádettegiden erte bastalyp ketti. Qystamaǵa qońdy kirgen býaz mal erte kóktemde-aq tóldeı bastaǵan. Naýryzdyń ańyzaǵy basylmaı jatyp-aq týǵan qozynyń sany 625 myń bastan asty. Al saqman maýsymynyń aıaqtalýyna áli bir jarym aıdaı ýaqyt bar. Buıyrsa, bıylǵy tóldiń tizimi 2 mln basqa jetedi degen boljam da joq emes.
Jalpy, oblystaǵy mal basy jyl saıyn kóbeıip keledi. Qazir aımaqtaǵy qoı sany 4 mln basqa jýyq. Onyń ishinde saýlyq qoıdyń sany 1 915,6 myń basqa jetken. Al qoı ósirýmen 109 irili-usaqty sharýashylyq aınalysyp otyr. Osylaısha jetisýlyq shopandardyń berekeli tirligi óńirdegi qoı sanynyń artýyna serpin berip qana qoımaı, Almaty oblysynyń ýaq mal sany jóninen respýblıka boıynsha ekinshi orynnan kórinýine jol ashqan.
– Bıylǵy saqman erte bastaldy. Kún raıynyń qubylmaly bolǵanyna qaramastan, shopandar kún-tún demeı tól alyp jatyr. Qazirge deıin oblystaǵy jas tóldiń sany 625 myń basqa jetti. Alda áli eki aıǵa jýyq ýaqyt bar. Iаǵnı qorjyn qozyǵa tola beredi degen úmittemiz. Tóldiń túsimi de jaman emes. Esep boıynsha, ár júz bas saýlyqtan 102 bastan qozy alýǵa qol jetedi degen boljam bar. Jalpy, bıyl oblys boıynsha
1 mln 870 myń bas tól alynady dep kútip otyrmyz, – deıdi oblystyq aýyl sharýashylyǵy basqarmasyna qarasty mal sharýashylyǵyn damytý bólimi basshysynyń orynbasary Baqtııar Shampyqov.
Aıtpaqshy, qoı sanynyń kóbeıýi oblystaǵy et óndirisine de ózindik yqpalyn tıgizip jatyr. Qazir Jetisý dalasynyń shúıgin shóbin jep ósken maldyń etine qyzyǵýshylar qatary artyp, daıyn ónim shet el naryǵyna shyǵa bastady. Bul salany damytýǵa álemge tanymal transulttyq kompanııalar da ınvestısııa quıýǵa kirisken. Máselen, Germanııanyń «Baýmann» kompanııasy «Jetisý qoı» jobasyn júzege asyrýǵa kirisken. Iаǵnı nemis aǵaıyndar oblys aýmaǵynda et óńdeıtin zaýyt salyp jatyr. Bul óndiris oshaǵy jylyna 30 myń tonnaǵa deıin ýaq maldyń etin tolyqtaı óńdep, naryqqa shyǵarmaq. Sondaı-aq, amerıkalyq «Taıson Fýds» kompanııasy da jylyna 500 myń bas mal etin óńdeýge qaýqarly et óńdeý zaýytyn salýǵa kiristi.
Almaty oblysy