Búgin elordada qurylysy uzaqqa sozylǵan turǵyn úılerdiń biriniń qurylysy aıaqtalǵanyn málim etti. Osylaısha 7 jyldan astam ýaqyt boıy páterlerin kútken 200-ge jýyq otbasynyń máselesi sheshildi. Bul týraly qala ákimdiginiń resmı saıty Altaı Kólginovtiń Instagram paraqshasyna silteme jasap habarlaıdy.
«Búgin – biz jáne «Zere-1» turǵyn úı kesheniniń úleskerleri úshin qýanyshty kún! Merekelik kúnder qarsańynda qurylysy uzaqqa sozylǵan taǵy bir nysannyń qurylysy aıaqtaldy. «Zere-1» turǵyn úı kesheni paıdalanýǵa berildi, turǵyndardyń qujattaryn rásimdeý boıynsha sońǵy jumystar júrip jatyr. Osylaısha 7 jyldan astam ýaqyt boıy páterlerin kútken 200-ge jýyq otbasynyń máselesi sheshildi.
Úıdiń qańqasy ǵana bolǵan. Birinshi kezekte úı men ınjenerlik jelilerdiń barlyq jobalyq-smetalyq qujattamasyn daıyndadyq. Turǵyn úı kesheni sý, elektr, jylý, káriz sııaqty ınjenerlik jelilerge qosyldy. Sondaı-aq turǵyn úı kesheniniń qasbeti boıynsha jumystar júrgizildi, terezeler, lıftiler, esikter jáne t. b. ornatyldy. Kóktemde abattandyrý jumystaryn bastaýdy tapsyrdym.
Memleket basshysynyń tapsyrmasyna sáıkes bir jarym jyl ishinde (2019 jyldyń jazynan beri) qurylysy uzaqqa sozylǵan nysandar sany 2 eseden astam azaıdy. Árbir nysan boıynsha qadamdyq is-sharalar jospary bar.
Bıyl páter kiltterin taǵy 7 myń úleskerge berýdi josparlap otyrmyz. Osylaısha úleskerler kópten kútken qonys toıyn toılap, páter ıegeri atanbaq», dep jazdy elorda ákimi.