Mádenıet jáne sport mınıstrliginiń «Áziret Sultan» memlekettik tarıhı-mádenı qoryq-mýzeıi» RMQK dırektory Nurbolat Ahmetjanov «Halyqaralyq týrızm jáne meımandostyq ýnıversıteti» KEAQ Basqarma Tóraǵasy – Rektor Maınıýra Mýrzamadıeva jáne Túrkistan qalasy ákimdiginiń «Bıznesti qoldaý jáne týrızm bólimi» memlekettik mekemesiniń «Týrısterge qyzmet kórsetý ortalyǵy» KMM dırektory E.Tólebaevpen ózara yntymaqtastyq týraly memorandýmǵa qol qoıdy, dep habarlaıdy Egemen.kz «Áziret Sultan» memlekettik tarıhı-mádenı qoryq-mýzeıiniń baspasóz qyzmetine silteme jasap.
Memorandýmnyń maqsaty - týrızmdi damytý jáne kelissózder júrgizý salalaryndaǵy is-áreketterdi úılestirý, ózara túsinistik negizde óz quzireti sheginde týrızm salasynda uzaq merzimdi jáne jan-jaqty qarym-qatynasty damytý, sondaı-aq, ishki týrızmdi úılestirýge, týrıstik ımıdjdi qalyptastyrýǵa birlese atsalysý.
Ekijaqty kelisimder barysynda týrıstik ónimderdiń jáne kórsetiletin qyzmetterdiń sapasyn jaqsartýǵa, ınvestısııa tartýǵa, týrızm salasyndaǵy mamandardyń biliktilikterin arttyrýǵa, turaqty týrızmdi damytýǵa baǵyttalǵan óńirler men respýblıkada jáne shetelderdegi týrıstik is-sharalarǵa qatysyp, úılesimdilikte jumys jasaý máselesi sóz boldy.
Týrızm salasyndaǵy jas mamandardy daıarlaý, týrıstik áleýetti arttyrý jáne kelýshilerge tıisti qyzmet kórsetýdi kózdegen joba mekemeler arasynda ortaq múdde qalyptastyryp, mádenı jáne áleýmettik damýdy nyǵaıtýǵa yqpal ete otyryp, básekege qabiletti týrıstik salany quratyndyǵy kútilýde.