«Atyraý» fýtbol komandasy aıyppul tóleıtin boldy, dep habarlaıdy Egemen.kz.
Qazaqstan fýtbol federasııasy «Atyraý»-«Shahter» komandalarynyń kezdesýinen keıin osyndaı sheshim qabyldady.
«Tártiptik reglamenttiń 45-baby 1-tarmaǵynyń 1-tarmaqshasyna sáıkes «Atyraý» komandasynyń oıynshysy Alekseı Rodıonov matchtyń resmı tulǵasyna ádepsiz sóz aıtqany úshin tórt matchqa shettetilsin. Shettetý merzimi 2021 jylǵy 14 naýryzdan bastap eseptelsin. Tártiptik reglamenttiń 118-babyna sáıkes «Atyraý» komandasynyń oıynshysy Sábıt Tastanbekovke 2021 jylǵy 14 naýryzdan bastap bolǵan ınsıdentti jan-jaqty jáne tolyq zańdy talqylaý úshin QFF aıasynda ótkiziletin barlyq jarystarda 30 (otyz) kúntizbelik kúnge shettetý túrindegi ýaqytsha sanksııa qoldanylsyn» delingen federasııanyń aqparatynda.
Federasııanyń málimetinshe, «Atyraý» fýtbol komandasy Qazaqstan chempıonaty men kýbogynyń matchtaryn ótkizýdiń tehnıkalyq reglamentin buzyp, matchty ınternet arqyly taratý múmkindigin, Premer-Lıga klýbtary arasyndaǵy 2021 jylǵa arnalǵan Olimpbet reglamenti-Qazaqstan Respýblıkasynyń chempıonaty negizinde stadıon aýmaǵynda (minbe astyndaǵy úı-jaıǵa) quqyq qorǵaý organdarynyń nemese jeke qurylymdardyń kúshimen tóreshiler brıgadasyn alyp júrýdi qamtamasyz etpegen.
Sol sebepten, «Atyraý» fýtbol komandasyna tártiptik reglamentiniń 66-babyna sáıkes buzýshylyqtardyń jıyntyǵymen 160 AEK mólsherinde aıyppul salyndy. Endi komanda 466 720 teńgeni 18 sáýirge deıin tóleýi tıis.