Bul kúnderi Úndistannyń Nıý-Delı qalasynda nysana kózdeý jáne stend atý sportynan lısenzııalyq álem kýbogi kezeńi ótýde dep habarlaıdy Egemen.kz Olympic.kz saıtyna silteme jasap.
Búgin stend atýdan "skıt" baǵdarlamasy boıynsha qazaqstandyq Zoıa Kravchenko kúmis medal jeńip aldy. Kravchenko fınalda ulybrıtanııalyq Ember Hıllden utyldy. Al qola medaldi Úndistan sportshysy ıelengen.
- Bul meniń álem kýbogi kezeńderinde jeńip alǵan alǵashqy medalim. Qýanyshymda shek joq. Jarysqa qatysýshylardyń bári de úlken daıyndyqpen kelgen. Sondyqtan, maǵan ońaı bolǵan joq. Álem kýbogine daıyndalatyn ýaqyt az boldy. Sondyqtan, men týrnır barysynda ózimdi jetildire tústim. Kúni boıy jarys alańynda júrgendikten, sharshaǵanym baıqalady. Dese de, medal alǵanyma qýanyshtymyn, - deıdi Kravchenko. Aqtyq synda jalpy esebi alty sportshy baq synady. Aıta ketelik, keshe pnevmatıkalyq tapanshamen 10 metrge nysana kózdeýden Eldar Imanqulov fınalda óner kórsetip, 7-shi orynǵa taban tiregen bolatyn. Nıý-Delıdegi álem kýbogi kezeńi 29 naýryzǵa deıin jalǵasady.