QR Premer-Mınıstri Asqar Mamın Máskeý qalasyna jumys sapary aıasynda RF Úkimetiniń Tóraǵasy Mıhaıl Mıshýstınmen, sondaı-aq Reseıdiń ortalyq memlekettik organdarynyń, memlekettik korporasııalary men qarjy-bank qurylymdarynyń basshylyǵymen kelissózder ótkizdi.
Úkimet basshylary saýda-ekonomıkalyq, qarjy-ınvestısııalyq, energetıka jáne ǵarysh salalaryndaǵy Qazaqstan-Reseı yntymaqtastyǵyn odan ári arttyrý máselelerin, sondaı-aq ónerkásiptik kooperasııa sheńberindegi jobalardy talqylady.
Eýrazııalyq ekonomıkalyq odaq formatyndaǵy ózara is-qımyldyń ózekti máseleleri qaraldy. COVID-19-dyń taralýyna qarsy kúres jáne eki eldiń ekonomıkalary úshin pandemııanyń saldaryn joıý jónindegi birlesken is-sharalarǵa erekshe nazar aýdaryldy.
«Spýtnık V» reseılik vaksınasynyń 4 mln dozasyn Qazaqstanǵa qosymsha jetkizý týraly ýaǵdalastyqqa qol jetkizildi. «Vırýstyń taralýyn jeńý úshin bizdiń elderimizdiń kúsh-jigerin, onyń ishinde halyqty jappaı vaksınasııalaý máselelerinde úılestirýdiń joǵary deńgeıi qajet», dedi A. Mamın.
Sonymen qatar bıylǵy jyldyń ekinshi jartysynda Kókshetaý qalasynda ótetin «Ekologııa jáne jasyl ósim salasyndaǵy yntymaqtastyq» taqyrybyna arnalǵan XVII Aımaqaralyq yntymaqtastyq forýmyna daıyndyq máselesi qaraldy.
QR men RF arasyndaǵy 2021-2025 jyldarǵa arnalǵan Ekonomıkalyq yntymaqtastyqtyń keshendi baǵdarlamasyn ázirleý jáne oǵan qol qoıý boıynsha jumysty jandandyrý qajettigi atap ótildi. Reseı – Qazaqstannyń negizgi syrtqy ekonomıkalyq seriktesi. 2020 jyly taýar aınalymy $18,2 mlrd qurady.
Qazaqstanda Reseı kapıtalynyń qatysýymen 10 myńnan astam kásiporyn jumys isteıdi, bul sheteldik qatysýy bar kásiporyndardyń jalpy sanynyń 36,1%-yn quraıdy. RF ónerkásip jáne saýda mınıstri Denıs Mantýrovpen jáne Reseıdiń tikeleı ınvestısııalar qorynyń bas dırektory Kırıll Dmıtrıevpen kezdesýde óńdeý ónerkásibindegi (farmasevtıka, mashına jasaý, metall óńdeý, hımııa ónerkásibi jáne t.b.) birlesken jobalardy iske asyrýdyń jaı-kúıi men perspektıvalary, sondaı-aq ekijaqty formatta jáne EAEO sheńberinde saýdany keńeıtý talqylandy.
«Rosgeologııa» basqarma tóraǵasy Sergeı Gorkıımen eki eldiń geologııa salasyndaǵy ózara is-qımylynyń ózekti máseleleri talqylandy. «Roskosmos» memlekettik korporasııasynyń bas dırektory Dmıtrıı Rogozınmen kezdesýde ǵarysh salasyndaǵy yntymaqtastyq jobalary qaraldy. Saparǵa QR Premer-Mınıstriniń orynbasary Roman Sklıar, Strategııalyq josparlaý jáne reformalar agenttiginiń tóraǵasy — AHQO basqarýshysy Qaırat Kelimbetov, ındýstrııa jáne ınfraqurylymdyq damý mınıstri Beıbit Atamqulov, densaýlyq saqtaý mınıstri Alekseı Soı, QR-nyń RF-daǵy Tótenshe jáne О́kiletti Elshisi Ermek Kósherbaev jáne t. b. qatysty.