«Astana Opera» sımfonııalyq orkestriniń mýzykanttary, tanymal «Astrobones» kvartetiniń músheleri Farhad Bolatov, Almas Saǵymbaev, Albına О́tegenova jáne Erasyl Ámeshov GRAND MUSIC ART beınejazbalary boıynsha mýzykanttar arasyndaǵy X Úlken Halyqaralyq baıqaýda birinshi júldeni ıelendi, dep habarlaıdy Egemen.kz
Baıqaýǵa qatysýshylardyń ónerin baǵalaý úshin shet elden jetekshi mýzykanttar shaqyrylǵan bolatyn. Úrmeli jáne soqpaly aspaptar atalymy boıynsha ártisterdiń sheberlik qabiletin Máskeý konservatorııasynyń dosenti, Reseı Memlekettik akademııalyq Úlken teatry orkestriniń solısi Alekseı Kornılev, Reseı Memlekettik akademııalyq Úlken teatry orkestriniń klarnetter tobynyń konsertmeıster-solısi Sergeı Petrov jáne Máskeý konservatorııasynyń professory, Shnıtke atyndaǵy MMMI professory, Reseı Memlekettik akademııalyq Úlken teatry orkestriniń solısi Erkın Iýsýpov baǵalady.
Máskeýde ótken halyqaralyq baıqaýǵa 200 qaladan 2760 mýzykant qatysty.– Biz úshin bul kútpegen jańalyq boldy. Saıysta jańa qurammen óner kórsettik, árıne alǵashqyda qobaljydyq, biraq qoıylǵan talapty minsiz oryndap, elimizdiń mýzykalyq ónerin Halyqaralyq baıqaýda laıyqty tanystyra bildik. Ásirese bul jeńiske Naýryz meıramy qarsańynda qol jetkizgenimiz mereıimizdi ósirdi. Qandaı baıqaý bolsyn mýzykant úshin óte mańyzdy, óıtkeni mundaı jobalar mýzykamen kóbirek aınalysýǵa, kúrdeli, qıyn shyǵarmalardy úırenýge múmkindik beredi. Bul jeńis bizdi shyn máninde shabyttandyrdy, endi túrli qyzyqty baǵdarlamalar daıyndaýdy josparlap otyrmyz. Sondaı-aq aldaǵy ýaqytta Reseıde arnaıy konsert bermek oıymyz bar. Basqa da festıvalderge shaqyrtý aldyq, eger epıdemıologııalyq ahýal jaqsarsa, onda jaqyn kúnderde Qazaqstannyń ónerin О́zbekstanda tanystyratyn bolamyz, – dep atap ótti kvartet jetekshisi Farhad Bolatov.
Odan bólek, baıqaý aıasynda ózekti taqyryptarǵa onlaın-dárister men sheberlik synyptary ótkizildi. Uıymdastyrýshylar keri baılanys múmkindikterin barynsha pysyqtap, kórsetilim kezinde tyńdarmandar dáriskerlerge suraqtar qoıdy.
Aıta ketetin jaıt, GRAND MUSIC ART baıqaýy beınejazbalar boıynsha ótkizildi. Halyqaralyq baıqaýǵa qashyqtan qatysý oryndaýshylarǵa zamanaýı jaǵdaıda óner kórsetip, geografııalyq alshaqtyqty eńserýge múmkindik berdi. Eń bastysy, daryndy oqýshylardyń biliktiligi men kásibı sheberligin ushtaýǵa jol ashyp berdi deýge tolyq negiz bar.