Byltyr respýblıkalyq bıýdjetten Aqtóbe oblysynyń aýyl sharýashylyǵy qurylymdaryna bólingen sýbsıdııalardy alýǵa óńirdegi sharýa qojalyqtarynan 5 myńnan asa ótinim kelip tústi. Ásirese jeke qojalyqtar mal azyǵyna sýbsıdııa alýǵa aıryqsha yntaly boldy.
Bıyl óńirdegi ósimdik, mal, astyq sharýashylyǵymen aınalysatyn qurylymdardy qoldaýǵa taǵy da 9 mlrd teńgeden astam qarjy qarastyryldy. «Oblystaǵy aýyl sharýashylyǵy qurylymdaryn mal azyǵyna beriletin sýbsıdııamen tolyq qamtamasyz etý úshin jergilikti bıýdjetten 4,4 mlrd teńge qosymsha qarjy bólýin surap otyrmyz. Onyń ishinde ótken jyldan aýysyp qalǵan 1,1 mlrd teńge aýyl sharýashylyǵy qurylymdary aldyndaǵy bereshekti jabýǵa jumsalady. Endi iri qara, jylqy, qoı, túıe sharýashylyǵyn damytý úshin qosymsha 3,3 mlrd teńge qajet», deıdi oblystyq aýyl sharýashylyǵy basqarmasynyń basshysy Q.Sársembaev.
Bul 2019 jyldyń sońynda bekitilgen «Aqtóbe oblysyn damytýdyń perspektıvalary» strategııalyq jobasy negizinde qolǵa alynǵan 217 ınvestısııalyq jobanyń alǵashqy nátıjeleri deýge bolady. Strategııalyq jospar negizinde Aqtóbe oblysynyń 12 aýdanynda mal sharýashylyǵyn damytý, shaǵyn kásipkerlik nysandaryn kóbeıtý mindetteri naqtylanǵan bolatyn. Nátıjesinde bir jarym jyl ishinde óńirdegi iri qara men usaq mal sany úsh esege, sýarmaly egis alqaby bes esege ulǵaıtyldy. Turǵyndardy sapaly azyq-túlikpen qamtamasyz etý úshin ár aýdanda iri taýarly jáne derbes fermerlik sharýa qojalyqtary quryldy. Sharýashylyqtardyń birizdilenýine memlekettik baǵdarlamalar arqyly arzan nesıelendirý saıasatynyń tıimdi túrde júrgizilýi de sebep boldy. О́tken jyly Aqtóbe oblysynyń aýylsharýashylyq qurylymdary 202,5 mlrd teńgeniń ónimin óndirdi. Mal basyn kóbeıtip, astyq pen bıdaı ósirip, baý-baqshamen aınalysatyn sharýashylyqtar sanynyń artýy jaǵynan Muǵaljar, Hromtaý, Mártók, Qarǵaly aýdandary alda tur. Máselen, 2020 jyldyń qorytyndysy boıynsha Mártók aýdandyq bıýdjetiniń kiris bóligi 1 mlrd teńgege ulǵaıǵan. Bul 13 aýyldyq okrýgi, 30 myńnan astam turǵyny bar aýdan úshin óte jaqsy kórsetkish.
Aýdan ekonomıkasynyń shyraıyn keltirgen Mártók aýdanyndaǵy Sarjansaı eldi mekeniniń janynda ornalasqan «AIS» taýarly sút fermasy. Sút fermasy 2010 jyly «QazAgroFınans» AQ qoldaýymen údemeli ındýstrııalyq damý baǵdarlamasy aıasynda qurylyp, alǵashqy jyldary jylyna 7 200 tonna sút óndirip, satylymǵa shyǵaryp júrdi.
Qazir «AIS» JShS sút ónimderin oblys ortalyǵyna ǵana emes, elimizdiń basqa óńirlerine, sonyń ishinde Reseıdiń Orynbor oblysyna da shyǵara bastady. Orynbor oblysynyń Aqbulaq, Qýandyq aýdanynyń turǵyndary «AIS» JShS ónimderin keńinen tutynady. Aqtóbe qalasynyń sýpermarketterin aıran, qaımaq, sary maı, súzbe, irimshik sııaqty tabıǵı taza ónimmen qamtamasyz etken osy kásiporyn jergilikti naryqtaǵy Reseı, Belarýs sút ónimderine básekeleske aınaldy.
Bıylǵy qańtar aıynda osy seriktestik basshylyǵy Mártók aýdany Táńirbergen aýyldyq okrýginiń ortalyǵy Sarjansaı eldi mekeniniń janyndaǵy 16 gektar aýmaqqa iri qara, sonyń ishinde saýyn sıyrlar ustaıtyn keshen qurylysyn bastady. Zamanaýı úlgidegi barlyq qondyrǵylarmen jabdyqtalatyn jańa sút fermasynyń qurylysy 68 mln teńgege baǵalanyp, joba «Bıznestiń jol kartasy-2025» memlekettik baǵdarlamasy aıasynda qarjylandyryldy. Endi 4-5 aı ishinde sútti sıyrlar úshin arnaıy saýyn ornymen jabdyqtalǵan keshen qurylysyn aıaqtaý josparlandy. Saýyn sıyrlardy qunarly jemshóppen qamtamasyz etý úshin Mártók aýdanynda sýarmaly sharýashylyq kólemi ulǵaıtylyp, sútti sıyrlardyń azyǵy – jońyshqa men júgeri ósirilip keledi.
«AIS» JShS dırektory Danııar Otarbaevtyń aıtýynsha, jazda keshen qurylysy aıaqtalǵan soń asyltuqymdy sútti sıyrlar ákelinedi. Jospar boıynsha erekshe kútimdegi bir sıyr jylyna 9 800 lıtr sút beredi. Osy sharýashylyqta eńbek ónimdiligi artsa, Sarjansaı aýylynda jańadan 250 jumys orny qurylady dep kútilýde.
Aqtóbe oblysynyń 600-den astam shaǵyn jáne orta kásipkerlik nysandary «Bıznestiń jol kartasy-2025» memlekettik baǵdarlamasy arqyly nesıelendirildi. О́z kásibin bastaǵan kásipkerlerdi qoldaý aıasy da jylma-jyl artyp keledi. Máselen, óńirdegi ShOB nysandaryna 2019 jyly 2,4 mlrd teńge bólinse, 2020 jyly onyń sany 3,1 mlrd teńgege ulǵaıǵan. Aýyl sharýashylyǵy qurylymdaryn jan-jaqty qoldaý memlekettik baǵdarlamalardyń kómegimen tıimdi iske asyp keledi. Erinbegen adamǵa aýylda da jumys kóp.
Aqtóbe oblysy